Excise Minister Er. Lalrinawma hovin a pisaah nimin khan Excise & Narcotics department official ten kum chanve Excise department hmalakna leh hnathawh hrang hrang thlirletin an thukhawm.
Minister Lalrinawma chuan Ruihhlo Do chu mitinin an mawhphurhnaa an ngaih a tul thu sawiin, ruihhlo do kawnga hmalatu Excise & Narcotics Department, Police leh YMA-te hmalaknate lawmawm tiin, an hmalakna tawiawm turin mi zawng zawng a sawm.
Kumin 2023 kum chanve (January – June) chhungin Excise & Narcotics department chuan zu leh ruihhlo thahnem tak a man a. Heng zu leh ruihhlo bakah helama inhnamhnawih, dan bawhchhiate man chhuahnaah Department hnathawkte bakah Central YMA hnuaia CADS te, Mizoram Police te, Para Military Force hrang hrang – Assam Rifles, Border Security Force, SIB te bakah tlawmngai pawl hrang hrangte thawhpuina tha tak neih a ni tih sorkar thuchhuahin a tarlang.
Kum chanve chhung hian Excise & Narcotics Department-in zu leh a kaihhnawh hrang hrang Rs. 6,48 72,116.00 man hu leh ruihhlo dang Rs 10,37,02,726.00 man hu an man a ni.
Excise & Narcotics Minister hova thutkhawmah hian district 3 – Hnahthial, Saitual leh Khawzawla District Office hawn belh chungchangte, Sub-Inspector of Excise & Narcotics lak belh chungchangte leh Department mamawh hrang hrang neih belh dan yur an ngaihtuahho nghal bawk.