India hmar lam state eng emaw zatah tun hnaiah ruah a sur nasa hle a, ni thum liam ta chhungin mi 34 chuang thi an awm phah tawh.
Khawpui leh thingtlang khua, kawngpui leh chenna in tam tak pawh khup thleng thlenga tui dai ngaiin a chim mek.
Weather department chuan Himachal Pradesh, Uttarakhand, Punjab, Haryana, Jammu & Kashmir, Rajasthan, Delhi leh a chhehvelah chuan ruah a la sur chhunzawm dawn niin an sawi.
Himachal Pradesh, Uttarakhand leh Delhi-a chengte chuan tuiin lehkhaa siam lawngleng ang maia lirthei a len lai te, mihring chenna laia chirh tawlh lut hum hum lai te, tui lianin thil a lak leh lei a hawrh khuarh dek deuk thlalak leh video chu an thehdarh nasa hle.
Himachal Pradesh-ah hian ruah nasa taka sur avangin lei a min a, tui a lian a, chenna in leh thil dang a chhe nasa a, nunphung a buai phah hle a. Manali, Kullu, Kinnaur leh Chamba-ah chuan Ravi, Beas, Satluj, Swan leh Chenab lui lianten dawr leh lirthei a la nasa hle.
Chief Minister Sukhwinder Singh Sukhu chuan darkar 24 lo awm leh tur chhung chu pawn chhuak lo turin mipui a ngen a. “Ruah tam tak a la sur a rinawm avangin inah tawm turin ka ngen a. Helpline pathum kan siam a. Heng hi harsatna neih chuan biak theih a ni a, nileng zankhuain puitu tur inrintir an ni,” tiin video message a tihchhuahah a sawi.
“Tun thlengin mi 20 chuang thi an awm tawh a. Lei min leh sabereka khuangkaih avanga thi hi an la tam lo hlauh va. National highway, district leh link road 1,300 chuangin a tuar a. Ni hnih lo awm leh tur chhung hi kan la buai hle dawn a ni,” tiin Minister Jagat Singh Negi chuan Thawhtanni khan a sawi bawk.
Uttarakhand-ah pawh lei min leh tui lian a nasa hle a, luite chu hlauhawm chhinchhiahna chung lamah an luang deuh vek tawh.
Gurgaon leh Delhi-ah chuan Thawhtanni khan ruah sur nasa avangin sikul khar a ni a. Gurgaon-a thuneitute chuan lirthei tang (jam) pumpelh a nih theih nan in lama a tam thei ang ber hna thawk turin mite an ngen.
Delhi sorkar chuan Haryana-in Yamuna lui an khuahna, Hathnikund atanga tui tam tak an chhuah hnuah control room 16 a din nghal.
Chief Minister Arvind Kejriwal chuan sorkar hotu liante chu khawlaia tui tling leh Yamuna chim chin sang zel chungchangah a thutkhawmpui a. Mi thiamten Delhi-a tui a len a rinawm loh tih an sawi niin Kejriwal chuan a sawi a, a lo liana a tul a nih chuan hmun hniama khawsate chu hmun himah an sawn tur thu a sawi bawk.
Jammu & Kashmir-a Kathua leh Samba district-ah chuan red alert tihchhuah a ni a. Hetih lai hian Amarnath Yatra chu ni thum chawlh a nih hnuah Pathianni khan Panjtarni leh Sheshnag base camp atanga kal leh theihin hawn a ni.
Rajasthan, Punjab leh Haryana-ah pawh ruah sur nasa avangin hmun hniam laiah tui a tling nasa hle a, thuneitute chu chet a tul huna che chhuak thei turin an inring.