- Ruata
Rei tak thawm lo nei tawh, micro SUV huanga Tata Punch te nena inel thei tur Hyundai Exter chu tlangzarh a ni ta a. Hyundai hian a man tur pawh puangzar nghalin tunah hian dealership hrang hrangah an pechhuak mek bawk a ni.
Chi hrang leh a man
Hyundai Exter hi Trim 7 – EX, EX (O), S, S (O), SX, SX (O) Connect te awmin Petrol manual khawl hmang ho hi Rs. 5,99,900 atanga Rs 9,31,990 inkar man a ni a. CNG model ho chu Rs 8,23,990 man atangin a intan ang a, AMT variant ho (automatic) ho hi Rs 7,96,980 man atangin a intan bawk dawn a ni. Heng a man tarlan te hi ex-showroom man a ni dawn a, Mizoramah a man tur nen a inmil chiah lo maithei a, a danglam tam awm lo ve.
Kentel hrang hrang
A man tlawm lam E leh EX (O) trim ho hian kentel tam tak a rawn nei lo ang a, 8-inch digital cluster with color TFT MID (Multi-Information Display), regional UI language hrang hrang support a nei thung dawn a ni. Exter micro SUV thara awm hrim hrim ho hi chu – 8-inch HD infotainment system with Apple CarPlay and Android Auto connectivity, BlueLink connectivity, ambient sounds of nature, Home-to-Car (H2C) with Alexa integration, OTA updates for maps and infotainment, leather-wrapped gear knob, leather seat upholstery, electric sunroof, wireless phone charger, motor-driven power steering, leh a dang dangte a ni a. A variant leh trim level azirin hengte hi a nei kimin a nei kim lo dawn a ni.
Himna hmanraw lam
Himna hmanrua lamah chuan a trim level hniam ber atanga a sang ber thlengin heng standard kit ho – airbag paruk (driver, passenger, side, leh curtain), ABS with EBD, central locking, speed-sensing auto door lock, impact-sensing auto door unlock, seat belt reminder, seat belt pretensioners & load limiters, immobilizer, burglar alarm, high-speed alert system, leh emergency stop signal te hi a awm vek ang a. A man to hoah hian himna hmanraw dang thenkhat – electronic stability control, hill start assist control, vehicle stability management, parking assist, headlamp escort system, automatic headlamps, rear defogger, leh Isofix child seat anchors te a awm dawn a ni. A to ber SX (O) Connect trim hian dashcam with dual cameras leh insider rear-view mirror te a nei bik bawk a ni.
A len zawng leh rawng chi hrang
Hyundai Exter micro SUV hi a dung 3815mm, a vang 1710mm leh a san zawng 1631mm a ni a, a wheelbase hi 2450mm a ni bawk a ni. A fuel tank-ah hian petrol litre 37 emaw 60-liter water equivalent CNG te a leng a ni. Rawng chi kua Ranger Khaki (new), Fiery Red, Starry Night, Cosmic Blue, Atlas White, Titan Grey, Ranger Khaki with Black Roof, Altas White with Black Roof leh Cosmic Blue with Black Roof te a awm a ni.
A khawl
A khawl lamah chuan 1.2-liter, 4-cylinder petrol khawl, Grand i10 NIOS leh Aura te hman ang a hmang a. 5-speed manual emaw AMT gearbox emaw nena thlunzawm niin he khawl hian 83PS power chu 6,000rpm-ah a pechhuak thei a, 114Nm torque chu 4,000rpm-ah a pechhuak thei bawk a ni. Factory-fitted CNG kit hmang pawh sawi tawh angin lei tur a awm a, CNG hmang hian 69PS power leh 95.2Nm torque te a pechhuak thei thung a ni.
Micro SUV huang pawh a rawn hausak belh zel a. India ramah hian he huanga mi Tata Punch chu hralh a kalin Mizoram thleng pawhin hralh a kal a, ngaina tu pawh a ngah em em mai a. Company hlun leh rintlak tho, Hyundai in micro SUV changkang tak a rawn nei ve hian inelna pawh a rawn siam viau hmel a. Lirthei leitute tan pawh he huangah hian duhthlan tur a tam lehzual dawn a, thil lawmawm tak a ni awm e.