Aizawl : Larsap Dr Hari Babu Kambhampati-a’n KVIC hnuaia scheme hrang hrang kalpui dan te official te sawipui.
Larsap chuan Khadi & Village Industries Commission (KVIC) hnuaia scheme hrang hrang kalpui a nih dan te KVIC hotute sawipuiin, KVIC hmalakna kalmek te chu chak zawka kalpui dan tur leh scheme hrang hrang te chhawr tangkaitu an pun zel dan tur te a sawipui.
Deputy Director, KVIC State Office Ashish Modak chuan Khadi Vikas Yojana (KVY), Prime Minister Employment generation Program (PMEGP), Gramogyog Vikas Yojana (GVY) leh SFURTU scheme hnuaia hmalakna kalpui mek, hmasawnna leh hmachhawpte a sawifiah bawk.
Larsap chuan KVIC hnuaia hmalakna chu chak zawka kalpui a tul tih a sawi a. KVIC kaltlanga thingtlang mite tana eizawnna tur siamsak, sumdawnna tenau hmanga bultan duh te tanpuina scheme leh a dang te chu mipui tam zawkin an la hre lo nia sawiin, KVIC hotu ten media chakna an hmanthiam a ngai niin a sawi.
KVIC hotute chu an beneficiary te hnenah an hlawhtlin theihna tur trade thlanpui thin tur leh Mizorama hmanraw tam deuh behchhan industry te sawimawi thin turin Larsap chuan thurawn a pe bawk.
Sorkar bank thenkhat Mizoram Rural Bank, SBI leh MCAB ten KVIC hnuaia scheme kalpui nan beneficiary te chhawmdawlna pawisa hlawm – margin money an pe chhuak tha nia a hriat thu pawh Larsap chuan a sawi a. “Hetih rual hian, Mizoramah private bank tam tak an lo lut a, sorkar atangin sum hlawm lian pui pui deposit an dawng teuh a, sorkar scheme pawimawh tak tak kalpuina atan pawisa an thehchhuak tha duh leh si lo” a ti a. Hei hi thil dik a ni lo tih sawiin, private bank te pawhin tan la se a duh thu a sawi bawk a ni.