Aizawl: Mizoram Govt Doctors’ Association (MGDA) chuan an thil phut tihlawhtling tura sorkar kar nan nimin khan an hnathawhna hmunah badge dum an bel a, chief minister-in an thil phut tihhlawhtlin a tiam avangin nawrh an kalpui mek chu nimin tlai khan an ti tawp leh nghal.
MGDA huaihawta Doctor ten badge dum an bel chhan hi Additional Chief- Secretary kaihhruai ‘MHS Re-structuring Committee’-in kum kaltaa rawtna a siam tawhte tun thlenga a la hlawhtlin loh vang a ni.
An lungawi lohna chungchangah hian MGDA hruaitute chuan sawm an nih angin nimin zing khan Deputy Chief Minister Tawnluia leh Health Minister Dr R Lalthangliana te nen an inkawm a, chawhnu lamah Chief Minister Zoramthanga nen inkawm lehin hetah hian CM chuan MHS Restructuring chungchang chu July thla Cabinet meeting-ah ngaihtuah ngeia a theih anga tihhlawhtlin ngei a lo tiam a, nawrh chhunzawm lo turin a lo ngen a ni.
Sorkar hotute nena an indawr hnu hian an kal zel dan tur ngaihtuahin MGDA hruaitute chu nimin tlai khan an thutkhawm leh a, chief minister leh sorkar hotu dangten an thil phut tihhlawhtlin an tum thu an sawi chu rintlakah an ngai a, an hnathawhna hmuna badge dum an bel mek leh July 13 atanga mass casual leave lak an tum chu thulh lailawk an rel a, sorkar thu ngaichang reng chungin hmalak dan tur ngaihtuah zel nise an ti a ni.