Aizawl : Mamit District Fisheries Development Office, Mamit-in nimin khan Rashtriya Krishi Vikas Yojana – Remunerative Approaches for Agriculture and Allied Sectors Rejuvenation (RKVY-RAFTAAR) 2020 – 21 Scheme hnuaiah National Fish Farmers Day Cum Capacity Building of Fish Farmer Training a buatsaih a. Mamit Bawrhsap V.L. Remliana’n a telpui.
Bawrhsap chuan ram leilung mila chin tur leh thar turah te kuthnathawktu ten ngaihtuahna hmang thin se a duh thu a sawi a. Mizoramah tuikhawlna atana tha ber pawl chu tuikhuah a nih thu sawiin, “Sangha a kan intodelh bakah water conservation lamah nasa takin kan than phah dawn a ni” a ti.
Sorkar atanga tanpuina an dawn te a nihna ang taka hmang thin turin kalkhawm te chu a chah a. Hun lo awm zel tur ngaihtuaha bultan tha tur leh farmers te hmahruaitu ni turin a chah bawk.
He hunah hian Nalzawl, Mamit district mi Ramtinchawma hnenah Best Fish Farmer Award hlan a ni a. A aiawhin a fapa Lalnunpui’n Bawrhsap hnen atangin chawimawina thuziak a dawng. Nunpuia chuan an tuikhuah lianah quintal 120 leh tuikhuah te-ah quintal 70 an thar thin thu a sawi a. An Tuikhuah enkawl dan leh phailam atanga Sangha lakluh a tam avanga an Sangha thar te hralhna lamah harsatna an tawh thin thu a sawi.
DFDO, Mamit Lalremsangpuii’n Riverine Conservation & Fisheries Rules (2019) & Act (2022) chungchangah zirtirna pein, FD Mamit Lalsiamliani’n Pond Construction & Management tih thupui hmangin zirtirna a pe a. FD Mamit Jimmy Lalbiaktluanga’n Common Carp breeding tih thupui hmangin zirtirna an pe bawk.