Aizawl South I bialtu MLA C Lalsawivunga’n Mizoramin chief minister tha, Pathian tih mi neih a phu tawh tih nimina ZPM party chhung inkhawmah a sawi.
Sawivunga chuan chief minister tha lo hnuaiah chuan mi thiam tak tak pawh engmah ti thei lovin an thu thuap mek tih leh ramin hma a sawn nan chief minister tha neih a tul thu a sawi.
ZPM-in sorkarna a chang a nih chuan an party Chief Ministerial Candidate Lalduhoma hruaina hnuaiah rorelna tha tun dina a awm ngei a rin thu a sawi a, an CM candidate chu Pathian thu ang taka ram rorelna kalpui ngam tur, dikna leh rinawmna nena ram hruai tur a nih thu leh central sawrkar dawr tur pawha duhthusam a nih thu a sawi.
Aizawl South I MLA chuan an party phel mek leh chhe ta hle anga sawi thinte chu anmahni leh anmahni an inbum mek a, Zoram mipui chu bum tumin hma an la mek tih a sawi a, beihna an tawh mek karah ZPM party an pung zel a, sem policy hmanga intodelh a theih tawh loh a ni tih ringtu Zoram hmun hrang hranga cheng ten an zawm mek zel tih a sawi bawk.
ZPM Party chhung inkhawm hi an party Adviser C.Lalsanglura’n a kaihruai a, Mamit, Tuikum leh Hachhek bial atangin bial viltute report ngaihthlak a ni bawk.