Myanmar chuan UK-a an ram aiawha palaia an dahin sipaiin mipui rorelna paih thlaa sorkarna an siam a duh lohna leh Aung San Suu Kyi an hren chhuah tura tihna a sawi avangin an ko haw.
Kyaw Zwar Minn hian BBC hnenah an ram chu ‘then’ a nih thu leh tualchhung indona a chhuah mai a hlauhawm thu a sawi.
Tar lan tawh thin angin Myanmar-ah hian sipaite chuan February 1 khan inthlana dik lo tam tak a awm tia chhuanlam siamin mipui rorelna an paih thla a, thuneihna an chang.
Suu Kyi-i kaihhruai, National League for Democracy (NLD) chuan inthlanah hian hnehna chiang takin an chang.
Khawvel ram hrang hrangte chuan sipaiten inthlana felhlel a awm tia an sawi chu an pawmpui lo va, an chet dan chu thil kalhmang a nih loh thu an sawi zawk.
Sipaite hian sorkar hotu lawkte manin Suu Kyi-i pawh a hmun hriat lohvah an hreng mek a. Thubuai hrang hrang siamsakin heng zingah hian ‘ram tana hlauhawm taka che’ tih leh dan lova ram dang siam walkie talkie la luta puhna pawh a tel.
Sipai colonel hlui, Kyaw Zwar Minn-a hian Thawhtanni khan BBC Burmese-in an kawmnaah sipaiten an ram mite an kah hlum a hmuh chuan hetiang thu hi sawi lo thei lo a nih thu a sawi.