Paris Saint-Germain chuan kum 27 mi defender Lucas Hernandez chu Bayern Munich atangin an lei.
Ligue 1 champion lai hian an player thar lakluh nan hian Pound maktaduai 34 vel an seng.
Kum 2018 World Cup a champion France team a defender tangkai Hernandez hian kum 2019-20 khan Bayern Munich a a season hmasa berah ‘treble champion’ a ni nghal a. Hemi kum hian league leh cup an chawi fel hnuah Champions League final-ah PSG hi an hmachhawn a, hnehna an chang.
Bundesliga champion lai tana vawi 107 inkhel tawh Hernandez hian kum nga contract Parc des Princes-ah hian a ziak.
“Ka phur tawh tak zet. Hun rei tak atang PSG a khelh hi ka chak tawh a, tunah a tak ram a chang dawn. Ka tan chuan ni duhawm tak a ni a, he club ka zawm thei hi ka lawm hle.” tiin Hernandez chuan a sawi.
Kum 2018 World Cup-ah France tan che tha hle mahse nikum Qatar World Cup-ah erawh group stage-ah a inhliam a, final thlengin a inkhel leh tawh lova. Club lamah pawh a season a tawp.
Marseille a piang Hernandez hi kum li mi a nihin Spain-ah an pem a, a nau, AC Milan left-back Theo Hernandez nen Atletico Madrid academy zawmin Madrid khawpui atangin professional football an khel tan a. Rojiblancos tan hian match 110 a khel hman bawk.