Pakistan-in a luah chiah Kashmir, Pakistan-occupied Kashmir (PoK) huam chhungah firfiakten training nana an hman hmun thahnem tak a la awm a, hengte hi inzir nan leh Jammu & Kashmir-a luh ruk nan an hmang thin niin nimin khan parliament-ah sawi a ni.
Rajya Sabha-a ziaka zawhna a chhannaah Union Minister of State for Home G.Kishan Reddy chuan sorkar laipui chuan Pakistan hnenah hian ramri kâna chetna chu titawp tur leh hemi atana hmanrua leh hmun hrang hrang awmte pawh tichhe turin a ti tih a sawi bawk.
“Report kan dawnah chuan Pakistan-occupied Jammu & Kashmir (PoJK)-ah hian terrorist training camp tam tak a awm a. Hengte hi thil hrang hrang inzir nan leh Jammu & Kashmir-a hel leh firfiakte lo luhna remchang atan hman a ni a. Hmun tam tak chu tun thleng pawha training camp atana hman reng a ni,” a ti.
Minister chuan sorkarin thenawm ram hnenah hian ramri kân firfiakte chetna thleng thin India lo luh ruk an tumna ang chi chu a awm lohna tura hmala turin a ti a. Ram pahnih inhrilh bakah ram bial tenau zawk inbiak leh ram dang kaltlang pawhin a hrilh reng thin niin a sawi.