UFC heavyweight champion Jon Jones chu November thlaah a champion kawnghren humhim turin cage a lut dawn. MMA fans te nghahhlelh bout a thleng dawn.
November thla a neih tur UFC 295-ah UFC chanchin a light-heavyweight leh heavyweight fighter hlawhtling berte an inhmachhawn dawn a, heavyweight huang thununtu ni reng thin Stipe Miocic leh Jones an intum ang.
New York a Madison Square Garden a neih turah hian UFC president Dana White chuan heavyweight champion vawi hnih ni tawh Miocic leh Jones te hi an intum dawn tih a sawi chiang.
UFC men’s pound-for-pound ranking a no.1 ni lai Jones hi mi tam takin khawvela mixed martial artist ropui berah an dah a. A record enin dah loh theih a ni lo.
27-1-1 record nei niin tlawm a ziah a nihna chhun pawh hi disqualification vang a ni. Light heavyweight champion tum hnih ni tawhin champion rei ber a ni bawk.
UFC a 205 pound division-ah hian vawi 11 a title a humhim a, UFC chanchin a title fight nei hnem ber a ni.
Kum thum a awl hnuah March khan cage lut lehin Cyril Gane chu heavyweight title match-ah a hneh a, a champion lehnghal.
Kum 35 mi Jones hi UFC chanchin a mahni title humhim hnem ber flyweight legend Demetrious Johnson nen an ni mek.
A khingpui tur 20-4 record nei Miocic hi mi theuneu a ni bik lo. Heavyweight champion tum hnih a ni tawh a. Hei bakah hian heavyweight huangah record a nei tha.
UFC a heavyweight title humhim hnem ber niin a zawnin vawi thum a title a humhim bawk.
Kum 2021 March khan UFC 260-ah Francis Ngannou laka tlawmin a title a hloh a. Hemi hnu hian cage chhung a la lut leh lo.
A tlawm hma hian a zawnin vawi hnih UFC Hall of Famer Daniel Cormier a zawnin a hneh a ni.