AIZAWL: Zo Re-Unification Organisation (ZORO) chuan Manipur tualchhung buaina hmeh mih thuai an phutna leh sorkar laipui auh-ei nan punkhawm an huaihawt tur thu an sawi a. He hunah hian Prime Minister Narendra Modi, Manipur Chief Minister Biren Singh leh Zo tlangval David Thiek lu tantu te lim an hal dawn niin an sawi.
Nimina Aizawl Press Club-ah thu thar thehdarhtute an kawmah ZORO President R Sangkawia chuan Manipur-a Zohnahthlak te Manipur chief minister N Biren Singh leh a uisathiam rual Manipur Police Commando te’n theihtawpa an puihna hnuaiah Meitei mipuiin thah chimih vek tumah puhin, “Zofa tam tak an that a, an in leh lo an hal chhiat sak a, pathian biakna in hmusit taka an hal chhia te, Meitei laka hliam tuar mi tam tak te, nunrawng taka an che te hi lungchhiatthlak kan ti,” a ti.
R Sangkawia chuan Meitei te’n Human rights an bawhchhiat nasat zia leh UN declaration on the rights of indegenious people an bawhchhiat thute thlenin UN chuan aw chhuah ngei tura an ngen tawh bakah, India president hnenah memorandum thawn tawh thu a sawi a. An thu thlenahte chuan tlangmite leh Meitei-te inkarah rorel hran pian tir chu remna siam nana kawng awm chhun nia an hriat thute an tar lan thu a sawi.
ZORO President chuan May 3, 2023 atanga Manipur buaina chuan ni 68 zet a awh hnuah pawh India sorkarin beng chhut ngawn san a, buaina tireh tura hma a la lo chu an ngai thiam thei lo tih a sawi a. Buaina ching fel tur ni awm taka a dah Para Militaray Force leh Army eng emaw zat chu Manipur Chief Minister thuhnuaiah dah a nih thu leh, Zofate rawt chimih tumtu ber Biren Singh thuneihna hnuaia Manipur a awm reng hi Zofate tan a him lo tih a sawi a. India sorkar auh ei nan leh Manipur-a buaina hmeh mih a nih thuai an phut a ni tih lantir nan July 12, 2023 (Nilaini) chhun dara 12-ah Vanapa Hall kawtah ‘Manipura kan Unau Zofate Tawrhpuina Punkhawm’ an huaihawt dawn tih a sawi.
Punkhawm-ah hian Zofa tupawh, Manipura Zohnahthlak unaute tawrhna tuarpuitute zawng zawng chu tel vek turin ZORO chuan an sawm tih a sawi a. He hunah hian Prime Minister Narendra Modi, Manipur Chief Minister Biren Singh leh Zo tlangval David Thiek lu tantu te lim hal a ni dawn tih a sawi bawk.
ZORO hruaitute hian Prime Minister Narendra Modi lim hal an tum chungchangah tute emaw hnen atangin kaltlang pui lo turin thurawn dawng mah se, committee-in an lo rel tawh angin tihhlawhtlin ngei an tum thu an sawi.
Central YMA in Manipur Zohnahthlakte thlavang hauh punkhawm huaihawt an tum an lo thulh tawh chungchangah The Zozam Times zawhna chhangin ZORO hruaitute chuan, “Mizoramah Manipur buaina chungchang hi a rik ve reng a ngai tawh a, boruak a daih mai chuan tanpuina tawp mei thei a nih dan te pawh theihtawpa kan inhrilhfiah hnuah, tunah chuan an ngaihdan te pawh a dang tan deuh tawh a, eng emaw boruak a awm ve reng a ngai a ni tih hi an hrethiam tawh viau mai a. Chuvangin, tun tumah hian punkhawm hi an tana huaihawt tum kan ni,” a ti.