Congress party-in tun hnaia an party zawmtu mi langsarte hmangin vantlang inkhawm an nei.
Vantlang inkhawm hi Serchhip Bazar-ah neih niin, Serchhip Block Congress President Lalramnghaka Kawlni-in a kaihruai a. Congress party zawm thar – Lalnunmawia Chuaungo, Vanneihthanga Vangchhawng leh Meriam L. Hrangchal ten Baktawng, Chhuanthar, Chhingchhip te an tlawh hnuah vantlang inkhawm hi neih a ni a, MPCC Treasurer Dr Lalmalsawma Nghaka’n a telpui bawk.
Tun hnaia Congress zawm ta, Mizoram chief secretary lo ni tawh, Lalnunmawia Chuaungo chuan thu sawiin, Congress-in sorkarna a chana Serchhip biala hmasawnna hnathawh turte chu a remchan dan angin bial neitute thawh tura hlan tum a ni dawn thu a sawi.
Sorkarah chief minister pawimawhzia sawiin Lalnunmawia Chuaungo chuan, MPCC President Lalsawta enkawlna hnuaiah finance commissioner hna a lo thawh tawhna atangin a rintlakzia a hmuh thu a sawi a. “Term hmasaa mipui beisei a phak lohnate kha insiam that nan hman kan tum dawn a ni,” tiin, rorelna dik hlen thei tura thawhpuiah Serchhip bial mipuite a sawm.
MPCC Social Media Consultant atana ruat thar, Vanneihthanga Vanchhawng pawhin media mi nih mai duh tawk lova party a luh chilh chhan chu ram siam that kawng an zawn vang a nih thu a sawi a. Chumi tur chuan MPCC president chu veng khat nia a lo thawhpui tawhnaa Mizo zinga a mi rin ber a nih vang leh Lalnunmawia’n ram siam thatna tura a lo duan, MPCC president-in tihhlawhtlin a tum vang a nih thu a sawi.
Party a zawm ve avanga media-a amah zuitu an kiam nasat thu leh hei hi a rin lawk a nih thu pawh sawiin Vanneihthanga Vanchhawng chuan, “Kalphung thara VC party siam ni lo din a nih theih dan turah mipui thuneihna tihlen a ni ang a, langtlang rorelna kalpui a ni ang a. Decentralization a taka kalpui a ni ang,” a ti.
Vanneihthanga Vanchhawng chuan restricted tender hman dik loh dan leh tender chhuah hmaa thawktu tur an inhriat lawk thin dante chu Cabinet Sub-committee on Reforms hmanga thunun tum a nih thu a sawi bawk.
Thusawitu dang, MPCC Treasurer Dr Lalmalsawma Nghaka chuan India ram chu thuang hniha kal nia sawiin, “Tute lamah nge kan kal dawn tih hi ngaihtuah ila. Hindu lal ram din duh, UCC kalpui tum bawk BJP lam nge sakhaw zalenna duh Congress party tih hi ngun taka ngaihtuah a ngai a ni,” a ti.
He hunah hian Congress aiawha Serchhip bial viltu, MPCC Secretary R. Vanlaltluanga leh Mizorama Vestige company enkawltu, tun hnaia Congress party zawmtu, Meriam L.Hrangchal pawhin thu a sawi.