Nikum Wimbledon hmeichhe final rematch a thleng dawn a. Ons Jabeur leh champion lai Elena Rybakina ten vawiin tlaiah semi-final luh an inchuh dawn.
Tunisian star hmasawn chak tak Jabeur hian round of 16 inkhelah vawi hnih champion tawh Petra Kvitova chu a thunun hneh hle a. 6-0 6-3 a chakin Kvitova hian nidang a pha lo.
Centre Court a Thawhtanni zana inkhelah Jabeur hian round hmasa lamah Bianca Andreescu lakah thapui nena a tan ngai mahse tun tumah hnehna a chang awlsam. Minute 22 chhunga set hmasa zawk a lak hnuah Czech star hian a service vawi hnih break let sak mahse a dang zo lo.
A khingpui tur Rybakina hian quarter-final a tling turin game nga bak a khelh a ngai lova, seeded number 13 Beatriz Haddad Maia laka 4-1 a hma a hruai laiin Haddad Maia hi inhliam avangin a inkhel chhunzawm thei lo.
Rybakina chuan, “Hetianga inkhel zawh hi thil nuam a ni ngai lo. A inhliam pawh na lutuk a nih loh ngei ka beisei. Beatriz-i vanduaina ka tawrhpui a, chutihrualin round dawt leh ka khel tur hi ka lawm.” tiin a sawi.