Azl: Sa, thlai leh thei mante bithliahtu, Lunglei District Level Committee on Fixation Price of Meat, Vegetable & Fruits Committee chu nimin khan DC Conference hall-ah thukhawmin thil hralh leh buk dik lote hremna dan tlawhchhana hmalak an rel.
Lunglei Bawrhsap Ramdinliani ho thutkhawmah hian a kaihhnawih department aiawh leh sumdawng pawl hrang hrang, market association leh sa talhtu aiawhten sa buk tling lo leh thlai tehkhawng awm lova hralh a ni thin chu an ngaimawh thu an sawi.
A bik takin thlai leh thei lama a department mawhphurtuten a ching leh thartuten hlawh chhe zawk an neih laia kharchhawngten an hlawh tam zawk thin chu ngaimawhawm an tih thu an sawi a. Hemi kawngah hian hmalak zel dan tur chu la ngaihtuahho leh nise an ti.
Thutkhawmah hian The Mizoram Market (Regulation & Recilitation) Act, 2022 hnuaia thil hralh leh buk dik lote hremna dan thar tlawhchhanin hmalak tum phawt nise an ti a. Printed price lova hralh leh buk dik loh pawizia mipuiteah zau zawka zirtirna kalpui an rel a ni.
Thlai leh sa man chungchangah pawh horticulture, agriculture, AH&Vety leh fishery department ten zirchianna neia an zirchianna behchhanin Lunglei Municipal Council area-ah kalpui phawt ni se, chawlhkar hnih hnuah sawiho leh tum nise tiin an rel a ni.