Mizo zaithiam zinga thawm nei lian ber pawl leh zaia sawm hlawh em em Sawmtea Chhangte chuan tun Sunday lo awm tur 16 July zan dar 6 – 9 inkar hian Maryland, USA ah Gospel Charity Concert a nei dawn.
He Concert hi Mizo Society of America leh Chin Association of USA in Sawmtea puala Concert an buatsaih tur a ni dawn a, a hmun atan hian Chin Baptist Mission Churh (CBMC) a ni ang. He Concert a sum hmuh zawng zawngte hi kan unau harsatna tawk mek Manipur leh Myanmar te tan a bo a bang awm lo a pek tur a ni a, sum hmuh ang ang te hi CYMA kutah hlan tur niin , CYMA kut atang hian a remchan dan ang zela pekchhuah tur a ni dawn bawk a ni.
Sawmtea puala concert nimahse hnam inpumkhatna leh tanrual a hun tih hriain , US a kan unau zaithiam lar ten Sawmtea hi an pui dawn a, zaithiam dang inlan tur te hi Joseph Suanlian, Rebecca Fanai, Sabina Fanai, Sui Par Chin te an ni dawn a, Live music nen Concert hi neih tur a ni.
Sawmtea chuan – Hetiang hun kan hmang thei tur hi ka lawm tak zet a, Mizoramah Charity in vawi tam tak ka penchhuak tawh a, USA ah pawh mahni tan ngawta kal ni lo in, midangte ka tanpui theihna awm chhun nia ka hriat leh ka duh em em kan ti hlawhtling thei tur hi ka lawm takzet a ni, kan unaute tanpui an ngai a, tlanchhe tur kan ni lo, khawi hmun atang pawhin kan tih theih ang tawk tih zel hi ka duh ber a ni, kan thawhchhuah tam leh kan unauten ei tur leh sin tur an nei tam dawn avangin theihtawpin ka tang a ni, tiin a sawi a.
He hun atan hian Mizo mipui, zohnahthlak zawng zawngte in mi tawngtaipuina ka ngen a, Pathian leh inzarah tha taka kan tih theih kan beisei a ni, a ti bawk.