Tun thla ni 7 atanga ni 9 inkar a Karnataka a 40th National Junior Kyorugi Taekwondo Championships neih zawh takah Mizo taekwondoist ten silver medal 1 leh bronze medal 2 an la.
Medal latute hi Taekwondo Academy of Best Friend zirlai R. Lalbiaknuami, Chaltlang Dingdi tleirawl niin silver medal a la a. Banglore NCOE-a zir mek Ramdingliani, Chanmari West leh Aizawl Taekwondo Academy zirlai Lalhmingsanga, Ramthar North ten bronze medal ve ve an la bawk.
Silver medal latu Biaknuami hian a match hmasa pathum chu straight set vekin hnehna a chang.
Chandigarh aiawh tumin 8-0, 5-3 in a hneh hnuah 6-0, 4-0 in West Bengal a hneh leh a. Quarterfinal-ah a thlengtu Karnataka aiawh 6-0, 6-3 in a hneh zui leh.
Semifinal-ah hian Uttarakhand tleirawl nen in tumin round hmasa ah 9-12 a tlawm zawk hnuah 8-7 in Biaknuamin la ve thung a. Deciding round-ah India team tan pawh a inel tawh a khingpui chu dang chatin 4-0 in hneh.
Final-ah Gujarat ami nen in tumin 1-11 in Biaknuami round hloh hmasa a, inhnehtawk takin 10-12 a khingpui hi a chak tlang ta a ni.
Mizoram tan a bronze medal latu Ramdingliani’n Under 52 kg ah khelin a match hmasa berah thenawm state Manipur chu 13-1, 12-2 in a sawp a. Round of 16-ah Uttar Pradesh in 6-7 in round la hmasa mahse 4-3 in a leh thal a, deciding round-ah 8-1 in chak.
Quarter final match-ah Goa a hmachhawn a, 1st round-ah 2-7 tlawm mahse leh Rami insiamthain 2nd round leh deciding round-ah 9-7, 6-7 hnehna a chang.
Semifinal match-ah a thlengtu Karnataka nen in tumin, 2-7 in Karnataka in a lak hnuin Ramin 9-7 Round ala ve leh a, deciding -ah 6-7 Karnataka vannei zawkah a tang.
Ramhlun North rawlthar Lalhmingsanga’n Under 59 kg ah khelin a match hmasa ber atan Uttarakhand 5-5, 3-7, 4-0 a hnehin round of 16 match-ah hian mawi takin 3-5, 5-1,10-5 in Jammu & Kashmir aiawh a lehthal.
Quarterfinal-ah Kerala tum lehin Hmingsanga hian kut inhliam chungin 4-5, 8-6,9-8 in hnehna a chang thei. Kut na chunga khel anih avangin 5-3, 3-0 Punjab lakah a tlawm.
Mizoram team hi hmeichia pali leh mipa paruk an ni a, Coach Lalinpuia, Armed Veng South (TABF) Manager Lalsangzuali, Tuikual ten an hruai. C.Lalzuitlunga Mission Vengthlang chu Technical Official a ni bawk.
Bronze medal latu Lalhmingsanga leh Mizoram team a che tha dang Robert Muanthansanga te chu India Academy tha, Peace Academy, Delhi an zawm nghal dawn a. Silver medal latu R.Lalbiaknuami chuan Champion of Champions match khel turin Hyderabad a pan ang.
Bronze medalist Ramdingliani chuan Bangalore SAI a pan ve dawn bawk a. Anni ho hi player te hi MATA Olympic Vision player te an ni.