Hachhek bialtu MLA Lalrindika Ralte chuan dan loa kuhva tawlh ruk titawp tura hma la nghal turin chief minister a ngen a, Hachhek Bial Kuhva Chingtu Pawl (HBKCP) pawhin vawiin atangin kuhva tawlh ruk vengin police check post-ah an duty tan dawn.
Lalrindika Ralte chuan nimin khan Chief Minister Zoramthanga chu pisaah hmuin ngenna lehkha a pe a. A lehkha thehluhah chuan an loa kuhva tawlh ruk titawp tura prime minister hnenah ngenna a lo thlen tawh thu leh Ministry of Home Affairs pawhin Mizoram chief secretary hnenah hma la tura a lo hriat tawh thu a tar lang.
Heti chunga Mizoram sorkarin dan loa kuhva tawlh titawp tura tihtakzeta hma a la duh lo chu hriatthiam har a tih thu te, Mizoram sorkara mi pawimawhte zingah kuhva smuggler-te thawhpui tlattute an awm ni ngeia ringtu tam tak an awm pawh mak a tih tak loh thu leh smuggler-te thlavang hauh tlattu chu a sorkar kaihhruai mek chu nia a hmu hial tawh tawh thu te a lehkhaah chuan a tar lang.
Dan bawhchhetute hrema dan tha taka zawmtu mipuite humhim chu sorkar mawhphurhna a nih avangin, dan loa kuhva tawlh titawp tura awmze neia hma la nghal turin kuthnathawktute aiawhin a ngen tih a tar lang bawk.
Hetihlai hian HBKCP Executive Committee, Thawhtannia Kawrthah North VC House-a thukhawm chuan kuhva thar chhuah hralh kawnga harsatna an neih lohna turin dan lova kuhva tawlhte an dan chah theih nan Zamuang Police Check Post behchhanin Nilaini zing dar 9 atangin chhum lo chat lova duty turin ruahmanna an siam a. Hachhek bial khaw hrang hrang atangin darkar 24 zel, a inchhawkin an duty dawn a ni.
HBKCP hruaitute thutkhawmah hian dan phal loh kuhva tawlhruk avanga kum 2022 chhunga Hachhek biala kuhva chingtu mipuite sum hmuh tur, an hmuh phak loh (hloh) zatte tar langin kum 2021-ah Rs. Nuai 3,235 chuang an hmuh lai leh kum 2022-ah Rs. Nuai 5,000 chuang hmuhchhuah an inbeisei laia Rs. Nuai 2,000 chuang an hloh tih tar lan a ni a, dan phal loh kuhva ro phurtuten harsatna an siamsak hi tawrh thiam harsa an tih thu an sawi a ni.