Aizawl: Aizawl South III bialtu MLA Prof F Lalnunmawia’n chung lamin sorkar leh turin MNF a buatsaih mek tih a sawi.
Nimina Lungsei khuaa mi thar lawm luh inkhawmah MNF Adviser ni bawk hian thu sawiin, kumtawp MLA inthlan lo awm turah MNF chu sorkar chhunzawm turin boruak a inher fuh chho zel tih sawiin, “Zoram hmun hrang hrangah ni tin MNF zawm thar an awm a, chung lamin sorkar leh turin min buatsaih mek niin a lang. Kan tih ni miah lovin kan elpui party-te tihbuaiin an awm a, hmasawn lam aiin hniam lam an pan a, mipuiin an lakah rinna an hloh mek,” a ti.
Mi thenkhatten sorkar leh MNF party hotute hi thu belhchian dawl lo hmanga beiin sawisel thin mah se, hri leng avanga kum thum vel chauh a taka hna thawhna an nei chung pawhin sorkar hnathawh leh thil tihthatte mipuiin an hai loh avangin ni tin MNF zawm thartu an nei zel tih a sawi a. “MNF sorkar leh hruaituten famkim lohnate an nei ve ngei ang. Chutih rual chuan kan sorkarin Zofate leh Zoram tana theihtawp a chhuahnate mipuiin an hmuhin MNF sorkar chungah rinna an nghat mek a ni,” Prof F Lalnunmawia’n a ti bawk.