Congress party chuan nimin khan Bhavan kawtah Rahul Gandhi laka central BJP sorkar rawng taka a chet an duh loh lantirna punkhawm (silent protest) leh a thlavang hauhna an buatsaih a. He hunah hian thusawi awm loin kalkhawmten puan dumin an hmui an tuam vek a ni.
MPCC-in an thuchhuah an tar lan danin, India ram political hruaitute zingah Gandhi hi BJP thahrui chhu chat tura hruaitu chak leh ropui a ni chho mek a. Vawi tam tak parliament chhung leh pawnah Narendra Modi leh sumdawng hausa tawntaw, Adani ten India mipui rawk tura sam an inphiar zawm dan a lo aupui tawh a. Hei hi central BJP sorkar chuan a huat em avangin jail a tan theih nan leh MP atanga bân a nih nan mawi leh mawi lo pawh sawi lovin a lakah rawng takin hma an la nghal a ni.
Gandhi chu thubuai phuahchawp tak neihtira MP a nihna atanga an bân nghal a, a MP quarter chhuahsan turin rang takin BJP sorkar hian hma a la nghal bawk.
Heti khawpa a laka harsatna an siam hnuah pawh Gandhi chuan, ‘BJP sorkar hnuaia rorelna dik lo hi India mipuite tan ka la au zel dawn a, a man (price) chu eng pawh ni rawh se, India mipuite tan ka inhlan ral ngam a ni,’ a ti.
Gandhi hian huaisen taka BJP sorkar hmachhawn a tum zel avangin eptu party lian eng emaw zatin kum 2024 inthlanpuia BJP sorkar paihthla turin Congress kaihhruaina hnuaia thawhho an tum.