LPS Special Report buatsaih thintu, Vanneihthanga Vanchhawng-in Congress party a zawm chhan sawiin, Mizoram leh Mizo hnam damna tura a ngaih leh a tuipui reform agenda tuipuitu party an nih vang niin a sawi.
South Tuipui block Congress conference, Hnahthiala neihah he thu hi nimin khan Vanneihthanga chuan a sawi a. “ZPM ni turah mi tam takin min ngaih laiin Congress lamah ka lut a. Kan ram leh hnam damna tura ka ngaih leh tuipui reform agenda hi ZPM-a an hotupa pakhat kan pe a, tuifinriata thlak ang vang vang a ni. Congress party hruaitute kan pe leh a, min lo tuipui em em a, min zirchiansak hial a, ‘hei hi a tuipuitute in ni a, a tihlawhtling turin kan thawkho dawn lo’m ni’ an tih tak avangin Congress party-ah kan lut ta a ni”, a ti.
Vanneihthanga chuan, Manipur buaina chungchang pawh sawiin, Kristian Biak In tam tak hal a nih tawh hnu ah pawh Kristian Chief Minister, Mizoram Chief Minister-in Kristiante thlavang hauhna ṭawngkam vawikhat pawh a la chhak chhuak lo niin a sawi a. “Kan unaute thlavang a hauh duh lova, a ngawih reng chhan hi NEDA hnuaiah BJP an zawm vang a ni” a ti.
“2018 MLA election dawnah party pakhat chuan BJP hnen aṭangin pawisa tam tham tak an dawng a nih kha” tiin, Vanneihthanga chuan “ZPM Leader hi June ni 27, 2023 khan zankhat riakin Guwahati-ah a zin a, engti turin nge a zin tih hi kan zawh chhuah a ṭul” a ti bawk.