Thawhtanni hian eptu party hrang hrangte chu an thukhawm leh dawn a, hetah hian Congress atangin Sonia Gandhi leh Rahul Gandhi pawh an tel dawn.
Bengaluru, Karnataka-a thutkhawm turah hian party 24 tel tura sawm an ni a, Aam Aadmi Party (AAP) pawh an tel.
Gandhi-i hian a hma ni chiahah eptu hruaitute tan zanriah a buatsaih dawn nia sawi a ni a, hetah pawh hian nakum inthlanpuia a huhova BJP beih dan tur an sawiho dawn a ni.
Party hrang hrangte hian eptu tangrualte hming tur leh a khaipa tur (coordinator) pawh an sawiho dawn nia sawi a ni.
Eptute hi Bihar Chief Minister Nitish Kumar-a koh khawmin an lo thukhwm tawh a, party 15 an tel a. Hemi hnuah hian Maharashtra-a Sharad Pawar-a kaihhruai, Nationalist Congress Party (NCP) chu a u fapa, Ajit Pawar chuan tiphelin Eknath Shinde-BJP tangrual sorkar a zawm.
NCP phel hian eptute thawhhona tur a tichhe thei dawn nia ngaihna a awm a, a bikin Bihar-ah a ni thei.
Tun tum thutkhawm tur hi Bengal thingtlang inthlana nasa taka Left leh Congress nen an inbeih hnuah Mamata Banerjee-i a tel vena hmasa tur a ni a. Mamata-i kaihhruai Trinamool Congress hian he inthlanah hian chiang taka hnehna changin BJP chu pahnihna an ni a, Left-Congress hi pathumna an ni.
Hetih lai hian Thawhtanni thutkhawmah hian a hmaa tel lo party pariat an tel dawn nia sawi a ni.
Heng zingah hian Marumalarchi Dravida Munnetra Kazhagam (MDMK), Kongu Desa Makkal Katchi (KDMK), Viduthalai Chiruthaigal Katchi (VCK), Revolutionary Socialist Party (RSP), All India Forward Bloc, Indian Union Muslim League (IUML), Kerala Congress (Joseph) leh Kerala Congress (Mani) te pawh an tel.
KDMK leh MDMK te hi kum 2014 inthlanah khan BJP nena tangho niin Prime Minister Narendra Modi-a a sorkar theih nana tangkai an ni.
Thutkhawmah hian a a taka thawk tak tak tur ho thum din te, hma an lak dan tur ruahman leh eptute tanrualna hming te chu an khel tur langsar deuh tur nia sawi a ni a. Heng bakah hian thu kalpui tur intawm an neih tur te, hma an lak nasat a ngaihna state leh a huhova vantlang inkhawm an neih dan turte pawh a tel.
Rajya Sabha-a Leader of Opposition nihna chelh mektu, Congress President Mallikarjun Kharge chuan meeting sawmna hi a pe chhuak a, hetah hian Patna-a an thutkhawm hmasak kha ‘a hlawhtling’ niin a tar lang.
“Hlawhtling taka thutkhawm niin kan rama mipui rorelna kalhmang derthawnna thil hrang hrang sawiin inthlanpui awm leh tura kan beihho dan turte kan sawiho a ni,” tiin Kharge hian a lehkhaah hian a ziak.
“Kha kan sawiho tawhte kha a bul kan tan tawh angin chhunzawm zel tura sawiho a ngai niin ka hria a. Kan ramin chona a hmachhawn hrang hrangte hi chhang let tura chet lak dan tur rel a ngai a ni,” a ti.
RJD chief Lalu Yadav chu damsam lo mah se Bengaluru thutkhawmah hian a tel dawn tih a sawi.