ZORO huaihawtin nimin khan Directorate Transport Office tualah Manipur Zohnahthlakte thlavang hauhna punkhawm neih a ni a, Prime Minister Narendra Modi, Manipur Chief Minister Biren Singh leh Zo tlangval, David Thiek lu tantu lim hal a ni.
He huna thusawitu, ZORO President R. Sangkawia chuan Meitei-ten kawng hrang hrangin Zofate chu an phiar ru a, Manipur sorkar nen tang dunin Zofate chu an bei tih a sawi a. Manipur tual chhung buaina hian thla hnih a pel tawh chunga India prime minister a ngawi reng chu an hrethiam lo hle tih sawi bawkin, Zofate chu India-in a ngaihsak lo nia an hriat thu a sawi.
Thusawitu dang, ZORO General Secretary L. Ramdinliana Renthlei chuan Manipur-a Zohnathlakte tawrhnaah hian Mizo thalaite thin a rim tawh a, an awm mai mai dawn lo tih sawiin, Mizoram chhunga Meitei-te pawh fimkhur turin a chah.
Pungkhawmte chuan resolution siamin Manipur tual chhung buaina avanga Zohnahthlakten nunna an chân a, chenna leh ei leh in tur tlachham thahnem tak an awm chu na an tih thu te, Zohnahthlakten Manipur state rorelna laka la hrang tura India sorkar an ngen mek chu an thlawp tlat thute an tar lang.
Heng bakah hian India sorkar hian Manipur state-a awm Zofate hi rorelna hran pe rawh se tih leh khawvel hmun hrang hranga awm Zofate an insuihkawma, lungrual taka an awma, rorelna pakhat hnuaia an awm theih nan hma an la zel dawn tih te a ni bawk.
Manipur Zohnahthlakte thlavang hauhna hunah hian tawngtairual hun hman a ni a, Manipur Chief Minister Biren Singh, Prime Minsiter Modi leh Zo tlangval David Thiek lu tantu, Mairembam Romesh Mangnag limte hal a ni bawk.