Aizawl : Hnahthial Bazar-a South Tuipui Block Conference nimina a hmanpuinaah tun hnaia Congress party zawm thar, chief secretary hlui Lalnunmawia Chuaungo chuan, MNF party in Uniform Civil Code (UCC) an dodal leh ngam lo ang tih chu a hlauh ber a nih thu a sawi.
Lalnunmawia Chuaungo chuan India ram zalenna sual chhuaktu leh sakhaw tlem zawkte, hnam tlem zawkte himna tura India danpui duang chhuaktu chu Congress Party a nih thu a sawi a. “BJP te hian UCC min hmanpui an tum mek a. Hei hi Congress party, Kristiante leh sakhaw tlem zawk ten nasa takin kan dodal mek a ni. CAA pawh nasa taka kan do laiin MNF te chuan an vote pui mai. UCC pawh MNF te hian an dodal leh ngam chuang lovang tih hi ka hlauh ber a ni,” a ti.
Mizoram Chief Secretary kal chhuak ta, Lalnunmawia Chuaungo chuan Mizoram-ah party lian pathum an awm mek a. Sorkar pawh an inring tlang vek a. Nimahsela, sakhaw humhimtu, hnam tenau zawkte chhawm dawl thintu chu Congress party an nih laiin party dang pahnihte hi chu sorkar mah se central lama Hindutva tuipuitu BJP zawmtu turte an ni tih a sawi.
Vanneihthanga Vanchhawng pawhin Congress party a zawm chhan sawiin, “ZPM ni turah mi tam takin min ngaih laiin Congress lamah ka lut a. Kan ram leh hnam damna tura ka ngaih leh ka tuipui em em reform agenda hi ZPM a an hotupa pakhat kan pe a. Mahse, tuifinriata thlak ang vang vang a ni a. Congress Party hruaitute kan pe leh a, min lo tuipui em em a, hei hi kan ram leh hnam damna tur a ni tiin a zir chianna te min neih sak a. Hei hi a tuipui tute in ni a, nangni hovin kan ti hlawhtling dawn lawm ni, a tih tak avangin kan ram leh hnam siam thatna tur a nih si avangin Congress Party ah kan lut ta a ni,” a ti.
MPCC Social media Consultant Vanneihthanga Vanchhawng chuan, thenawm state lawka buaina nasa tak awmah Krsitian bial in tam tak hal ni mah se, Kristian CM, Mizoram CM hian Kristiante thlavang hauhna tawngkam vawikhat pawh a la chhak chhuak lo niin a sawi a. Zohnahthlak thlavang hauh duh lova a ngawih reng chhan chu NEDA hnuaiah BJP an zawm vang niin a sawi a.
Kum 2018 MLA inthlan dawnah party pakhatin BJP hnen atangin pawisa tam tham tak an dawn thu leh, ZPM Leader chu June 27, 2023 khan zan khat riakin Guwahati-ah a zin a, a zin chhan zawh chhuah a tul thu a sawi bawk.
He hunah hian Meriam L Hrangchal pawhin thu a sawi a. MPCC Treasurer Dr Lalmalsawma Nghala chuan Congress-ah mi eng emaw zat a lawm lut bawk.