Aizawl: Aam Aadmi Party (AAP) Mizoram chuan Mizorama political party-ten eirukna do an tum thu sawi thin mah se hemi chungchangah hian intiamna engmah an siam thei lo tih an sawi.
AAP Mizoram hruaitute chuan nimin khan Aizawl Press Club-ah thuthar thehdarhtute an kawm a, an president, Andrew Lalremkima chuan party dangten an policy leh an tih turte an sawi ah eirukna do an tum thu sawi vek thin mah se engtin nge hmalak an tum sawi chianna an nei ngai lo tih a sawi.
Andrew-a chuan AAP Mizoram erawhin sorkarna an chang a nih chuan hmasawnna hnathawh atang leh thil dang reng rengah minister leh MLA-ten eng percent mah an la ve dawn lo tih Mizoram mipui an tiam tih a sawi.
AAP Mizoram president chuan inthlan hnaih ruala zirna siam that chungchang party dangten an aupui chu lawmawm an ti a, chutihrualin a taka thlentir duh tak takna rilru pu turin an ngen tih an sawi a ni.
AAP Mizoramin sorkar siam tha turin hma an la zel dawn tih leh Mizoramin zirna tha a neih ngei theih nan kum 2023 inthlan lo turah AAP vote turin mipui an sawm tih a sawi bawk a ni.