Kumin Wimbledon hmeichhe singles inelna a wildcard hmanga tel Elina Svitolina chuan champion tura rinhlawh ber seeded number one leh world number one ni lai Iga Swiatek chu a barakhaih a, semi-final a inhlangkai.
Kum 24 mi Swiatek hi US Open leh French Open champion lai a ni a. Tunhnaia hmeichhe tennis a che tha fal zing ami a nih avangin rin a hlawh. Nimahsela thui tak a la thlen ngai lohna grass court chu a mutan ngai a la ni.
Ukraine star Svitolina hian nikum October khan fanu a neih hnuah kumin April atangin WTA Tour zawmin inelna a hmachhawn leh chauh a. 7-5 6-7 (5-7) 6-2 in Swiatek hi a hneh.
World number three lo ni tawh kum 28 mi Svitolina chuan, “Semi-final ka lut hi ka tan chuan thil mak a tling zawk hial. Ka beisei loh thil a nih avangin a boruak hi nuam ti takin ka hmang phawt ang.”
“Tournament tan tirah khan semi-final i khel dawn min ti se ka awih lova, world number one i hneh dawn ti se a sawitu kha an uang emaw ka ti ang.” tiin a chak hnuah a sawi.
Semi-final ah hian ani ang thova beisei loh result thlen tirtu a hmachhawn dawn a. Marketa Vondrousova nen an inkhel dawn.
Seeded ni pha lo Vondrousova hian seeded number four ni lai Jessica Pegula 6-4 2-6 6-4 in a hneh ve bawk a. Inhliam avanga thla ruk a chawlh hnuah Wimbledon a a thlen san ber tum a tawng.