Aston Villa chuan Spain centre-back Pau Torres chu Villarreal atangin Pound maktaduai 31.5 velin an lalut.
Kum 26 mi hian Yellow Submarines a amah lo enkawl tawhtu Unai Emery hnuaiah a khel leh dawn a. Kum 2020 atanga 2023 inkar khan Emery hnuaiah hian hlawhtling takin a khel.
Torres hian kum 2003 khan Villarreal youth academy a zawm a. First team tana player pawimawh tak ni chhovin a chawrchhuahna club-ah hian vawi 173 a inkhel tawh a, goal 12 a khung tawh.
Torres hian a contract neihlaiah Pound maktaduai 60 vela leichhuah theihna a nei a, nimahsela kum khat chauh contract a neih tawh avangin club pahnihte indawrin inremna an nei thei.
Kum 2016 khan Villarreal tan khel tanin kum 13 chhunga an khawchhunga piang ngei club tana khel thei an neih leh hmasak ber a ni a. Villarreal first team a hmun a chan hma hian inchher hriam nan Malaga tan loan in a khel tawh bawk.
Villarreal tlarhnungah mi pawimawh ni nghal thuaiin 2021 Europa League champion an nihna kawngah a pawimawh hle a. Final a Manchester United laka penalty pet goal zingah a tel.
Kum 2019 khan Spain tan inkhel tanin ram tan vawi 23 a inkhel tawh a. Euro 2020 leh 2022 World Cup-ah Spain tan a inkhel tawh.
Aston Villa hian tun nipuiah an squad an tihchakna tura player an lakluh pahnihna a ni a. Belgium midfielder Youri Tielemans chu free transfer in an lalut tawh
Villa-ah hian tlarhnungah Tyrone Mings, Ezri Konsa leh Diego Carlos te nen tlarhnungah an inel ang.