Zoram Peoples Movement (ZPM)-in bial viltu tura an ruatte’n intuaitharna hun hmangin, kumin MLA inthlan lo awm turah thlan tlin an nih chuan hleprukna laka fihlim MLA ni turin ban pharin an intiam.
L&B Resort-a Thawhlehnia ZPM bial viltute intuaitharna inkhawm chhawng hnih chu Vice President Rev. Dr K Thanzauva leh Dr Kenneth Chawngliana ten an kaihruai a, sawihona hi chief ministerial candidate Lalduhoma leh GS i/c Policy Dr KC Lalmalsawmzauva te’n an kaihruai.
Bial viltute hian ruat an nih tan kumin April thla leh tun inkara an bial vil chhunga hmasawnna leh harsatna an tawhte an sawiho a, an zirho nghal bawk.
ZPM thil tum an aupui mek zingah bana kaih policy chu thalaite’n an tuipui thu te, thlai thar hralhna rate siam chu lo neitute’n an tuipui thu te, kalphung thar mipui sorkar chu mi tinin an nghahhlelh tawh thute an sawi uar hle. Long term policy zingah kawlphethaa intodelh thuai tura mipui beiseina a san thu an sawi bawk.
A thlawna sem policy chu mipuiten an hnawl tawh avangin vote thlak dawnah pawh sum semin awmzia a neih an rin loh thu bial viltute chuan an sawi a, mipuite khawngaih vote dawng turin tihtak zeta inngaihtlawm a pawimawh tih an inzirtir.
June 6, 2023 khan ZPM bial viltute hian Saitualah intuai tharna hun hi an lo hmang tawh bawk a ni.