Aizawl: Serchhip leh Hnahthial district-ah vantlang inkhawm an neih hnuah, tun hnaia Congress party zawmtu mi langsarte chuan Lunglei-ah nimin khan Lunglei Town Congress Workers’ Meet an hmanpui leh.
Lunglei District Congress Committee (LDCC) buatsaiha Congress Bhawan, Lungleiah Meet an hman puinaah Lalnunmawia Chuaungo chuan Congress party chu ram leh hnam damna tur nia a hriat Reform Agenda pawmpui awmchhun party an nih vang niin a sawi.
Chief Secretary hlui Lalnunmawia Chuaungo chuan party thenkhatin Reform Agenda hi zawrh chi-ah an ngai loin, an ngaihsak zui duh lo tih sawiin, “Congress party hotute erawh kan pek khan a zir chianna kan neih mai bakah, a hruaituten a hranpa a zir chianna an neih bawk avangin Pu Lalsawta kaihhruai Congress party hi luhna tlak berah ngaiin ka lut ta a ni,” a ti.
Sorkar tha nei tur chuan chief minister tha neih a ngai a, party lian hruaitu pathum hi mipuiten an zir chian a ngai tih sawiin Lalnunmawia Chuaungo chuan, “Dawt hmanga mipui hnena inzuar thin an ni em? Sum leh paiah an rinawm em? Tawngkam thiam avang ringawta mipui bum tum thin an ni em, tih kan zir chian a ngai,” a ti.
LDCC President KL Chhawnzauva kaihhruai vantlang inkhawmah Vanneihthanga Vanchhawng leh Meriam Hrangchal te pawhin thu an sawi.