Aizawl: Mizoram tlawha lo zin Union Minister of State for Agriculture and Farmers’ Welfare, Sushri Sobha Karandlaje hnenah Hachhek Bial Kuhva Chingtu pawl (HBKCP) leh Taitesena Group YMA chuan Nilaini khan hmuin, dan lova kuhva tawlh chungchang leh an harsatna te zirchianga tanpuina awm theite pe tura ngenna ziakin an thlen.
Union Minister hi HBKCP leh Taitesena Group YMA aiawhin Vanlalruata Pachuau chuan Lengpui Airport-ah hmuin, Hachhek tlangdunga kuhva tam hri (Yellow Leaf Disease – YLD) chungchanga zirchianna nei tur leh he tlangdung kuhva chinga eizawngtu te harsatna sukiang a tanpui turin ngenna hi a thlen a ni.
Sobha Karandlaje chuan a awmna state Karnataka-ah pawh hetiang harsatna hi an lo tawrh nasat tawh thu lo sawiin, a lo hrethiam hle a, YLD-in Mizoram a lo tuam thleng ta leh farmer ten an tuar ve ta chu pawi a tih thu a lo hrilh a. District bawrhsap leh a mawhphurtu department te’n zirchiangin ministry lamah report siam se, theihtawp lo chhuahpui a intiam a ni.