- Reuben Lalnunthara Hnamte
Tunlai khawvêl thiamna sâng tak leh changkâng takah kan chêng mêk a, inkalpawhna te, inbiakna leh kawng hrang hrangah a ni têlin khawvêl hian hma a sâwn zêl a. Chutih lai kârah chuan kan ram ngei pawhin hmasâwn lam kan panin kan thang chho ve zêl a, a ram hmasawnna ai mahin a mipui rilru sûkthlêk hian hma a sâwn zâwk em ni a tih theih hial! Tunhma kha chuan kan State pâwnlama mite hi an fingin lehkha an thiama a, an rilru a chak bik ni-a hriatnate kan nei thîn a, ‘uisa ei thluakin a tluk lo’ tih kha kan ti ti dân phung a ni thin. Vai kan han tih mai te hi an thluak a tha in, lehkha te pawh thiamthei a, rilru chak bik riaua hriatna te neiin tluk loh enin kan en fo thin. Tunah erawh chuan Mizo thalai lehkhathiam leh rilru chak tak tak, fing fel tak tak an lo awm ta nuk mai. Foreign-a awm leh leh hnathawk te pawh tam tak an lo awm ta. A dik tak chuan vai kan han tih maite hi an fing bikin an thluak a tha bik lêm lo, an thiltih leh zirlaiah hian rilru an pe na êm a, an hrâtlâk a ni ber; heng avâng hian an thiam niin kan hre mai mai thin. An kallohna lam (an englo thên lohna lam) ah chuan tlaw tak an ni. Mizote erawh danglamna riau kan nei; thil hi kan thiam zung zung a, kan ti thei zel zul bawk.
Thiltih ngai hi kan ning a, thil pakhatah hian kan rilru kan pe nasa peih loh thin avâng hian kan hlawhtling lo mai mai thin. Vai kan han tih hote hi chu an thiltihah rilru tak tak a ti an nih thin avâng hian, an thiltiha an hlawhtlin loh chuan mahni intihlum ta maite pawh an awm nawk thin a nih hi. Lehkha zirna lamah pawh zofa mi thiam tak tak kan awm ta nawk a, sumdâwnna lamah pawh hlawhtling tak tak sawi tûr an tam ta. Mizo thalaite hi kan mi chhuanawm tak tak, fing fel leh hlawhtling sawi tûr kan la awm dawn chauh. Nimahse, kan tlâkchham deuh chu in tawiawmna(support) hi niin ka hria. Kan rilru changkânna leh thiamna hi kan ram hmasâwnna hian a umpha lo em ni aw tih tein ka ngaihtuah thin. Thalai chher tlâk kan ngah tawh, India ramah pawh lang phak, a ber nihna Football lamah pawh mizo tlangval 2 lai kan lo awm ve ta. Tun ai hian kan thalaite chher leh tawiawmna kawngah hian rilru pu zawk phei ila chuan khawvêl hriat hlawh khawp hi kan ni mai dawn niin a lang. State thenawmte thîk tham khawp hi kan ni thuai thei tlat a ni.
A bîk takin zirna lamah hian tan lâk a ngai hlein a lang a; thalai lehkhathiam thei tak tak an awm ta nawk mai. Kan Education system-te pawh hi tihchangtlun a, Sorkar school te pawh tun aia hmasâwn zâwk tûra tan lâk hi a tûl takzet tawh. Party induhsaknate, inhmelhriat thatnate, inlaichinna avânga induhsakna sira hnâwl a, mi thiam leh mi bikte chherchhuah hi kan ram hmasâwnna kailâwn pawimawh tak a ni. Kan mizo hnam tlêmte hian ‘Bîk nihna’ riau hi kan nei a, kan ramah sualna a pungin leh mi tha lo tam tak an awm rualin Pathian hnaih tlat tu, nitina tawngtai leh Pathian auh hlah ngailote hian kan ram hi a chhanhim êm êm a. Prayer Mountain-ah hian a mi mal taka tawngtai tûr kal nitin mi sâwm tel an awm thin a, chawngheia ni 7 te, ni 10 te tawngtai riaklût te mi tam tak an awm. Kohhran ang te, thian zaho te, pâwl angtea tawngtai an awm zut reng bawk. Heng mite’n thahnemngai taka Lalpa an auhna rah hi kan ram hian a seng zel a, an va hlu tak em! Sap hote, hnamdang thenkhate pawhin Prayer mountaina tawngtaina hmun an an tlawh zauh zauh a, ‘ hetiang hmun hi kan ramah a awm ve lo’ an ti a, an hlutin an benglût thei hle.
Pathian hi thil engkim ruahmantu leh thil hote a kan ngaih thlenga siamtu leh dintu a nih ang hian Amah hnaiha bel tlat tu te kan nih chuan kan ram leh mimalte pawh hma kan sawn zel ang. Sorkarna thleng pawh hian Pathian thu a ni a, Pathian duhzawng nilova ram kan hruai a nih chuan tihmualphovin kan awm zel dawn. Lal Saula pawh kha Pathianin a kalsan chinah chuan mi nuihzabur a ni a, lal niin, thiltithei ni a inhriatna nei mah se, chakna a nei tawh lo va, tleirawlte pakhat ve mai Davida hlauvin thah tumin a um ruai mai a nih kha. Enge a chhan kan tih chuan Davida khan Pathian a hnaih tlat a, Pathianin a thuam miau a lawm. Ram rorelna , Sorkar hna, mimal hna pawh ni se; dik tak leh thahnemngai taka miin a thawh chuan Pathian malsawmna leh hmasawnna a nei thin. Pathian zah lova, diko taka thawktute erawh chu an hunlaiin vul viau mahse, rei an daih ngai lo, an thlahte thlengin Pathian hremna an tawk thin a ni.
Hmana atang tawha ngaimawhawm ka tih ve thin chu kan Aizawl khawchhûng kawngpui grade chhe lutuk hi a ni. Kumtin maia siamthat ngai reng mai mak ka lo ti ve thin. Khawpui kawng tal hi chu tlo deuh tur leh mam tha deuh a siam awm tak ni hian ka lo hre ve thin. Kan state thenawm ka hmuh ve tawh hova an khawpui kawng te hi a tha thin em em mai a. Agartala te khu an khawpui chhung kawng chu tha tak mai hi a ni a, kan Aizawl khawpui hi zawng kan tlan sawt boh boh mai zawng a nih hi maw. Eng pawh lo sorkar pawh ni se, kan khawpui kawng hi chu Tourist lokalte hmuh atan pawha zahpuiawm lo deuh a kan siam hi chu a pawimawh khawp mai. Kan Airp[ort te pawh hi tihchangtlun atan a a itawm khawp mai a, Domestic chauh nilovin Internetional Airportah te hlankai ni ve thei se chuan tun aiiin kan thalai tam tak ten zirna lamah te, sumdanwgte tan elh programme pawimawh kalte tan malsawmna te a nih ngei a rinawm. Tunah hian Agartala Airport khu International Airportah hlânkai ni tawhin, thla leh mai atangin Bangladesh thlawhna a rawn tum tawh dawn a ni.
Ram changkâng tûr chuan mipui rilru hmasâwnna hi ram hmasawnna hian a ûmphâk a tûl a, chumi atân chuan inkalpawhna tha te, zirna tha te, inbiakpawhna lam hmasawnna te leh a dangte pawh a pawimawh vek mai. Keimahni ram tharchhuah ngei ei leh bar lam, thlai rah leh thei lam chi te to lutukte hi enge a chhan ni ang? Fur laiin inkalpawhnan a chhe deuh a thali man te a letin a to awlh mai thin te hi Kristian ram tiha mawi a ni angem? Agartalaa kan awmlai khan, kart hum chhung ngawt strike avangin Asssam lam atangin petrol te, ei lehin lam te a rawn thleng thei lo va, kha tih chhung khan thil man a to a ka hre miah lova, a vang a ni mai. Petrol black a zuar chu an awm ve a, mahse, a ruk thei ang berin an zuar a, police hriat an hlau em em mai a ni. Duhamna lamah kan thang ta lutuk em ni ang le? Duhamnah hian kan ram chu min eichhe mek a nih hi. Kan Bible chuan Duhamna chu milem biakna a ti daih mai ( Kolossa. 3:5). Ringtu tha kan ni a kan lan lai hian milem bia hi kan lo tam viau mai lo maw?
Mizote hian danglamnna tak kan nei a, thenkhatin Israel thlah ni a inngai a lo Israel e mem te, lo pem ta hial te pawh kan awm nawk a ni. A engpawh chu nise, a pawimawh ber chu Pathian hnaiha, amah tih tu nih hi a ni. A eng thlah pawh lo ni ila, Pathian kan tih a a thu anga kan awm loh chuan eng tihna mah a ni lo vang. Kan thlaite ti hmasawn a, khawvel hriat khawpa chawisang tur leh kan eizawnna nghet leh tha zawk siam tura ke pen tur hian kan tanrual a ngai. Mizo thalai, nu leh pa te ah hian mi chhuanawm tak tak, mi talent ngah tak tak an awm nual; hengte tihmasawn tur hian tan ila zel teh ang. Mizote kan danglamna, tuipui ral hial atanga Pathian zawnchhuah hnam, Pathian tih mi leh tawngtai mi te tam tak awmna hi Khawvel hriatah lang tham turin kawng hrang hranga ke i pen ang u hmiang.