Aizawl Mayor Lalrinenga Sailo chuan chenna in hnaiha vawk vulh titawp tura hma lak an tumna chu khawpui thianghlimna leh mihring hriselna tura atana ruahmanna siam an nih thu a sawi.
The Zozam Times-in a kawmnaah Aizawl Mayor chuan, June 28, 2023-a board of councillors thukhawm chuan mihring chenna atanga ft 100 aia hnaiah vawk vulh khap a rel tih a sawi a, “He kan hmalakna chungchang hi hre fiah tawk lote pawh an awm thei a, khawpui puma vawk vulh khapna tur a ni lo a, mihring chenna hnai lutuk bika vulh khapna a ni a, hmun hma nei te chuan an chenna in atanga ft 100 pelah chuan an vulh thei,” a ti.
AMC-in chenna in hnaih taka vawk vulh khap a rel hi tuna hman nghal vut vut tur a ni lo tih mayor chuan sawiin, tuna an in bul hnaia vawk vulh mekte an lo in siam rem theih nan ft 100 aia hnaia vawk vulh khapna chu January ni 15,2024 atangin kenkawh tan a ni dawn tih a sawi.
AMC BOC chuan chenna in bul hnaia vawk vulh chungchang hi an lo khel ho fo tawh a, August 31, 2021-a BOC thutkhawmah pawh vawk vulhin khawpui vawn thianghlim kawngah harsatna a thlen dante an lo sawi ho tawh a, khawpui chhunga vawk vulh chungchangah mipui zirtirna kalpuite an lo rel tawh a ni.