Chinese pa, kum 24 zet a fapa bo zawnga motorbike-a km 5,00,000 chuang a zin kual hnuah a hmu leh ta.
Guo Gangtang-a fapa hi kum hnih mi lek a nih laiin mihringa sumdawngten Shandong province-a an chenna in kawta a tla lai an ruksak.
A fapa bo chanchin hi kum 2015-a movie siam, Hong Kong superstar Andy Lau-a channaah pawh khan tilan a ni nghe nghe.
China-ah hian naupang ruk bo hi a hluar hle a, kum tin sang tel ruk an ni thin.
Ministry of Public Security-in a tar lan dan chuan police-ten a fapa nen hian DNA hmanga endikin an hre thei a. A ru botu nia rinhlelh mi pahnih pawh chhui zuiin man an ni tawh niin Global Times chanchinbu chuan a tar lang.
Mi man pahnihte hian an ruk lai hian naupang hi hralh atan an ti niin China News chuan a tar lang bawk.
Guo-a fapa hi amah chauhva an in kawta a lo awm an hmuh chuan mi man zinga hmeichhia zawk, Tang-i an tih chuan pawmin bus station-a amah lo nghaktu, a thawhpui, Hu-a hnen a panpui ta a ni.
An pahnih hian khawpui inkalpawhna bus hmangin an thenawma Henan province-ah an kalpui a, an hralh ta a ni.
Tual chhung chanchinbute chuan Guo-a hi an hralhna province-ah hian a lo la cheng reng niin an tar lang.
“Tunah chuan hmuh a ni ta a, tun atang chuan hlim hun a ni ta,” tiin Guo hian thuthar lakhawmtute hnenah a sawi.
Kum 1997-a a fapa an ruksak hnuah Guo-a hi an rama province 20 zet zin kualin a motorbike hmangin a dap zui char char a ni.
A zin kualnaah hian chetsual pawh tawkin a ruhte pawh a titliak a, kawng laka suam pawh a tawk a. Motorbike pawh 10 lai a khalh chhe hman.
A kalna apiangah a fapa thlalak hi a tar a, sum a heh loh nan lei hnuaiah a riak a, mi tanpuina pawh a dil kual nasa hle thin bawk.
A fapa a zawnnaah a beih nasat hle lai hian China-a mi bote chhung pawl (missing-persons organisation)-ah pawh member langsar tak a ni a, an fate an ruksak nupa pasarih lai chu an fate a hmuhsak hman.
Guo-a fapa hmuh a nih thu leh a awmna puan a nih chiah hian Chinese social media-ah chuan amah thlawpna thu a darh nasa hle bawk.