Mizoram First, Central YMA, New Market Chawhmeh Zuar Joint Association leh Mizo Cement Mistiri Association ten New Market Bazar building sak mek chu chak zawk leh tha zawka hna thawk tura an phut thu thuchhuah intawm an siam.
Nilaini khan Mizoram First pawl huaihawtin Central YMA pisa, Tuikhuahtlangah pawl pali te hian New Market Bazar sak thar chungchang an sawi ho a. Hemi hnuah thuchhuah intawm siamin, Aizawl bazarpui sak mek chu hna chak zawka thawh a nih theih nan building satu, Lushai Engineer Private Ltd hian hnathawktu leh khawl tam zawk dah tur te, hna thawh zawh tawh zingah him lo leh tha tawk lo a awm a nih siam that leh te an phut thute an tar lang.
Heng bakah contractor-in hna thawktu vil turin Lushai Engineer hnuaia rawih lai mek Qualified Engineer a hmunah awmchilhtir te leh he hna viltu tur Qualified Engineer nihna dinhmun leh biakpawh theihna phone number tar lan te, hna thawhna hmunah Detailed Structural Drawing hmuh theih turin tar chhuah te, item hrang hrangte thawh zawh hun tur ziahna Bar Chart/Graphical Work Schedule mipui hmuh theih turin hna thawhna hmunah tar chhuah te, contractor hian tender leh contract inremna he hna thawhna tur hmanrua ziah lante mipui hmuh theih turin hna thawhna hmunah tar lan te an phut thu an tar lang bawk.
Mizoram sorkar pawh nitin hna thawh uluk taka vil leh enpui turin Qualified Civil Engineer dah rawh se, tih te tuna concrete hna thawh zawh tawh zawng zawng hi design leh estimate anga tha leh him tawk a ni ngei em tih third party inspection nei turin sorkarin Mizoram University/IIT Guwahati sawm rawh se tihte a tel bawk.