Tun hnaia Zoram People’s Movement (ZPM) General Headquarters atanga bâng mi thenkhatin Congress party an zawm a. Mizoram Pradesh Congress Committee (MPCC)-in an puala lawm luh inkhawm hi nimin khan Lal Thanhawla Auditorium-ah buatsaihin, an president Lalsawta’n a lawm lut.
MPCC President Lalsawta’n a lawm luhte hi VL Remruatpuia, Political Affairs Committee member, Research Wing member, Market Study Team Member, ZPM General Hqrs; Lalsanglura Ralte, Political Affairs Committee member, Tawngtai Pawl Secretary, ZPM General Hqrs; Lalhmingthanga Sailo, Executive Member, ZPM General Hqrs te an ni.
Congress party zawm thar zing a mi Lalhmingthanga Sailo hi kumin MLA inthlan lo awm tura Congress ticket-a Dampa biala ding tura ngaih a ni.
Mi thar lawm lut tu Lalsawta chuan, “Kan ram dinhmun kan hria a. HIV/drugs/eirukna leh thluaka sum lut natna a hluar hle a. Ral atanga heng hi a thlirtu kan ni thei lo. Politics hmanga do let a ngai,” a ti.
Edmund Burke chuan sual hneha awm dan awlsam ber chu, ‘mi thate an ngawih reng hi a ni’ a ti tih sawiin Lalsawta chuan, “Politics tha lo titute chu mi tha lote hnuaiah an kun tho ang. Heng mi tha lote hnuaia kan kun lohna turin mi thate lo chhuak ula, keini leh chhuan lo la awm zel turte tan ram tha zawk i din ang u,” a ti bawk.
Congress president hian an party zawm tharte chuan an kal tumna, an chuanna lam pan tur driver-in motor a khalh loh avanga chhukin, an tum ram pan tur leh sorkar tha siam turin Congress an pan niin a sawi a. “Congress party chuan an tum ram an pan tur hi kan hlenchhuah sak dawn a. Congress party hi ram siam thatna inpui a ni,” tiin, ram tha zawk an beisei chu an thlen pui dawn tih a sawi.
Lalsawta chuan sakhaw zalenna dodalna thlipuiin India ram ram a run mek a, UCC leh sakhaw zalenna duh lotute do tur hian Kristiante an tanrual a ngai tih a sawi a. Hun kal tawhah Mizoram mipuite’n nasa takin CAB an do a. Mahse, MNF chuan an ‘amen’ a, an kutah an intulut a, Mizo hnam leh sakhua dinhmun him lovah an dah tih sawiin Lalsawta chuan, “Kan hnam leh sakhua, kan dinhmun ti tleu tu hi Congress Party chuan kan do zel dawn,” a ti a. Kumin 2023 inthlan hian Mizo hnam leh sakhua a him leh him loh a hril dawn a. Kohhran leh NGO te, political party te pawh Mizo hnam lungphum tihnghina awm mek dopui turin a sawm.
MPCC Vice President Lal Thanzara kaihhruai inkhawmah hian mi thar lawmluh atangin VL Remruatpuia, Lalsanglura Ralte leh Lalhmingthanga Sailo te pawhin thu an sawi a ni.