IPL dintu min hausa tawntaw Lalit Modi nena sawi luh an ni chiah chu ‘Gold digger’ anga umzuina a tam nghal vut vut hle a, Sushmita Sen erawh chuan heti anga an puhna hi instagram atangin a chhang.
“Kan chhehvel khawvel hlim lohzia leh hahthlak ta em em hian rilru a ti na hle mai. Fing tak tak innngai te’n thil ho te angah te rilru seng a, an han ti vak vak thin chu a zia lo deuh a ni.
Ka thian te pawh ni lo, thawhpui te lah ni hek lo.. ka la hmuh ngai miah loh te’n an ngaihdan ropui leh hriatna thuk em em mai te hmanga ka nun leh nunghchang an han ‘share’ kual peih vel hi chu a mak a ni tawp mai. ‘Gold Dipper’ ah min han chhuah chu a ni a, an fing reuh!
“Gold aia thuk zawk ka lai mek a ni a, tunhma atang tawha ‘Diamond’ ngaina zawk ka ni a, tun thleng pawh hian ka la inlei thin.
“Thinlung taka min duhsaktu te leh min hmangaihtute chungah ka lawm a, ka hmangaih a che u.. Khawngaih takin hei hi lo hria ula, Sush hi a tha e, ngaihtuahawm a ni lo. Mi dangte thlawpna leh pawmna zawng ruai ruai thin ka ni ngai lo. Ni ka ni a, ka chhia leh tha hriatna hmangin a bu lailum ka luah zel ang,” tiin Miss Universe 94 hian Instagram-ah amah diriam a, ‘gold digger’ anga chhuahtute a chhanglet.