Ultimate Fighting Championship-ah awptu nghet nei thei lo division a awm. Light heavyweight title kawltu an awm lo leh tawh a, champion lai Jamahal Hill chuan a inhliam avangin a champion kawnghren chu a chhuahsan tih a sawi.
Kum 32 mi Hill hian Zirtawpni khan a kheimit a ti na a, hei vang hian a championship hi a chhuahsan dawn tih a sawi a. Hun engemaw chen a chawlh a ngai dawn tih a sawi tel.
“Ka thu nise ka kawnghren hi ka hlan let dawn lo. Mahse kan dinnaah kan ngheh a ngai a, kan infiamnaah hian awl bik awm a thiang lo. Title inchuhna hi a kal reng tur a ni a, keimah ka nih avanga ka awl bik chhan tur a awm lo.” tiin a sawi.
Hill hian January thla khan UFC 283 ah champion hlui Glover Teixeira hnehin title ruak an inchuh chu a la.
December khan Teixeira hian champion lai Jiri Prochazka hmachhawn tur a ni a, mahse Czech fighter a inhliam avangin champion hlui Jan Blachowicz leh Magomed Ankalaev te chuan Prochazka title chhuahsan chu an inchuh a. Split draw result neiin champion thar an awm lova. Teixeira leh Hill ten an inchuh phah ta a ni.
Hill hi a zawna vawi li chak lai a ni a, “Champion dik tak chu ka ni a, ka lo kir leh hunah ka nihna ka lantir ang.” a ti bawk.
205 pound title inchuhna engtinnge a kal zel dawn tih zawhna a lian zui viau a. Hming sawi rik zingah Blachowicz, Alex Pereira leh Prochazka te thawm a ring lehnghal hle.