India chuan European Parliament-in a ram chhung, Manipur-a chi leh chi inkara buaina chhuak chungchanga thutlukna (resolution) a lo siam chu a dem a, a ram chhung thila lo inrawlhah a puh.
May thla tir atanga hmarchhak state-a tharum thawhna thlengah hian mi 130 chuang an thi tawh.
Buaina avang hian mi sang telin an in leh lo tlanchhiatsanin hmun him dang an pan phah a, tam tak chu relief camp-ah an khawsak a ngaih phah.
EU-in resolution a siamah hian tharum thawhna thleng chu ‘Hindu tihlen tumna avanga inthendarhna policy kalpui’ vanga chhuak niin tar lan a ni.
Hetianga a ram chhung thil thlenga EU-in aw a neih lai mek hian Indian Prime Minister Narendra Modi-a chuan Ningani khan ni hnih châm turin France a thleng a, an rama civil mite chawimawina sang ber, Grand Cross of the Legion of Honour hlan a ni ang.
Strasbourg, France-a EU Parliament thutkhawm mekah hian plenary session-ah Manipur-a tharum thawhna thlenga mihring dikna chanvo palzut a nih dan te, mipui rorelna kalphung lova chet a nih dan te leh dan lo anga chetna awm te sawihovin resolution an siam a ni.
Ningani khan Indian foreign ministry chuan chhang ve nghalin, ‘hetianga India ram chhung thil thlenga inrawlhna awm hi pawm theih loh, ram awptu nihna rilru putna atanga chhuak’ a nih thu a sawi.
EU Parliament chuan a huam chhung thil chauh a ngaihtuah tur a nih thu a tar lang bawk.
Manipur-a tharum thawhna hi May thla tira ram leilung fa, Kuki-ten Meitei-ten tribal status an dil an duh lohna atanga intan a ni.
Hemi hnuah hian lehlam lehlam hian an chenna, lirthei, biak in leh temple an inbeihsak niin thuneitute chuan an sawi.
Buaina avang hian he state-a Kuki leh Meitei inkarah khi nasa tak chhuakin an inthen phawk a ni.
European Parliament-in resolution a siamah hian ‘BJP party mite kaihhruaia nationalist rilru tihlanna’ tiin an dah a ni.
Sorkar laipui leh Manipur thuneitute chu a tuartu nunau puih phal tur te, a hranpaa buaina chhuak chhui phalna siam tur leh politics hruaitute pawh inrintawnna a awm theihna tur tichhe thei zawnga thu hriam tak tak sawi lo turten an ngen bawk.
Parliament hian internet service pawh tinung leh tawh tur leh hel beihna dan, mi tam takin an sawisel thin, Manipur-a hman mek, Armed Forces Special Powers Act (Afspa) pawh hlip turin a ngen bawk.
Indian thuneitute chuan Manipur-a thil thleng hi ngun taka vilin remna leh muanna leh dan leh thupek kenkawh that a nih leh theih nan kawng dap zel a ni tih an sawi.
Tun tum hi khawthlang ram leh activist-ten India an khak vawi khatna a ni lo va. Modi-a’n June thlaa US a tlawh tum khan liberal democrat thenkhat chuan a rama mihring dikna chanvo palzutna a tam em avangin Congress-a a thu sawi chu an lo boycott tawh a ni.