Aizawl: ZPM Chief Organiser RL Liantluanga chuan party dang leh pawn lam atanga ZPM beitute dawt phuahchawp avangin an nghing lo tih sawiin, “‘Tuna kan dinhmun hi ruling party ngei hnenah pawh hian inthleng ang u,’ ti ila, rang taka inthlengpui min duh ang,” a ti.
Nimina ZPM-in an party pisa-a political session an hmanah thu sawiin RL Liantluanga chuan, ZPM inpumkhatna thatzia chu party chhunga awmten an hriatchian thu a sawi a. Party dang leh pawn lam atanga ZPM beitute dawt phuahchawp avangin an nghing lo a, inlungrual lo anga sawitu party-te hian ZPM dinhmun hi an awt hle tih a sawi.
Mipuiin ZPM sorkar hun an nghakhlel tih sawiin RL Liantluanga chuan, “Bial tinah an rawn lut sup sup mek a ni. Bial vil tur kan puan hma thatzia kan la hre zel dawn a, kan phur em em a. Kum 2018 inthlanpui atang khan hnunglam kan hawikir tawh lo,” tiin, Pathian leh mipuite zarah kalphung thar, mipui sorkar an siam ngei dawn tih a sawi.
Sorkarna siam tawh party pahnihten eirukna an do tak tak lohzia chu a hrechiangtu an nih thu sawiin, “ZPM-in Pathian leh mipui zara sorkarna kan siam a nih chuan mipui chanai eiruk hmangte tan hmun a awm dawn lo a ni,” a ti a. ZPM party mipui sorkarah chuan thalai hnathawk rualte tan hna tau a tet dawn niin a sawi bawk.
ZPM Party Political Session hi Vunghnuna, Secretary-in a kaihruai a, He hun hi K.Sapdanga, Working President leh MLA VL Zaithanzama te pawhin an hmanpui a ni.