Tunlaia India politics thu lar tak Uniform Civil Court chungchangah Rajya Sabha a kan ram aiawhtu Pu K. Vanlalvena chuan 22nd Law commission ah duh lohna thu a thlen ta a. Parliament a put luh a nih hunah pawh a thlawp loh tur thu a sawi chiang ta bawk. A lawmawm hle.
Law commission hian he dan Lok Sabha a put luh tumah hian mipui ngaihdan a la a. India ram hmun hrang hrang atangin dodalna a na hle. Mizoramah chuan kan kohhran ten an thlawp loh tur thu an puang tawh a. Political party ten an puang tawh bawk. Kan northeast state pui ho ah chuan he dan hi an duh lo fur dawn niin a lang a. Nagaland-ah chuan pawl pakhat chuan Nagaland assembly in pawmpuina a pek chuan an MLA zawng zawngte in hal sak vekah an vau hial a ni. BJP rorel lohna state zawngin an dodal dawn niin a lang. South India states hruaitute pawhin an duh loh thu an aupui ring hle.
He dan siam tum hian eng nge a nghawng dawn chiah tih hi chhut chian a ngai a. BJP hian India ram hi hmanlaia Hindu lal ram anga kir leh a, Hindu sakhaw kalphung anga awp vek an duh a. Chumi tihhlawhtlinna atan chuan dan chi hrang hrang, zawi zawia loh theih loha mipuiten kan zawm ngai siam chhoh zel an tum a ni. He dan hi siam a lo nih chuan keini hnam dana kan ro inkhawm dan chu Hindu sakhaw danin a luah nghal ang a. Kan inneihna certificate kohhranin min pek ve chuan sawrkarah awmzia a nei tawh lovang. Thil tam takah kan zawm loh theih loh sawrkar dan tesep a lo piang ang a. Chung dan tesep zawng zawng chu Hindu sakhaw lam rawngkai vek a ni tawh ang.
Heng thil hi a lo thlen hunah chuan kan ral raih raih dawn a. Ring taka kan sawi thin kan Mizo nationalism te chu a bo hret hret ang a. Thangtharte chuan sawi pawh an sawi ri tawh lo thei hial ang.
Amaherawh chu BJP hi mawl taka hma la an ni bik lova. India ram zau zawka an duh dan an pawm a, a tlang na tur a nih chuan northeast chu kan awl e an ti thei bawk. Mahse, helaiah chiah hian kan inven a ngai. Tunhnai lawka kan hmuh chian em em chu Jammu and Kashmir thil thleng hi a ni. J&K hi ram dan pui hnuai a ro inrelna hrang nei thlap an ni. India sawrkar laipui chuan vawilehkhat a presidents rule a dahin a awp thut mai a. An duh dan danin an state chu hawlh phelin UT ah an dah a. An inhumhalhna dan chuan awmzia a nei lo chiang hle. Hengte hi hre rengin thlemna kan tawh hunah pawh kan ram hruaitute hi in veng thei se. Kan sakhua leh hnam tan nghet taka dingin, huai takin ke han pen teh se. Mipuiin phur takin kan thlawp zui vek bawk ang.