AIZAWL: MNF Sr. Vice President Tawnluia dan puia inziak article 371G humhim tur leh Uniform Civil Code (UCC) hmang lo turin an theih chhung chu an bei zel dawn tih a sawi.
Nimina Mizo Hnam Rum chhung inkhawmah thu sawiin Tawnluia chuan MNF danpuiah Mizoram huam chinin a huam ram leilungte ram rorelna pakhat hnuaia inzawmkhawm chu a tum bul ber leh Mizote sakhua himna a nih thu a sawi a. Hei hi India article 371G-ah chiang takin a inziak tih a sawi.
Deputy chief minister ni bawk, Tawnluia chuan, “Mizote nun sakhua, vantlang nun leh an ram leilung te hi a neitu bik an nihnaah India parliament-in a tidanglam thei lo vang, tiin kan constitution-ah inziak ngat a, he article 371G hi engti kawng zawng pawhin humhim turin a tawp thlengin kan bei ang tih hi kan chhinchhiah ka duh a ni,” a ti.
UCC chungchang sawiin Tawnluia chuan, “India ram hi secularism, sakhaw zalenna ram a ni a, chutihlai chuan UCC hi chuan min chawhchawrawi ta a, inkhairual tumna dan hi siam tumna a lian em em a, state thenkhatah phei chuan an pass hlawm tawh a, chutihlai chuan kan party erawh chuan Mizoram kohhran hruaitute leh YMA te nen chuan, he UCC hi a nihna ang ang hman chi a nilo, kan ti a. Keini chuan article 371G tanchhan khan hetia hrut rual ve pawrh chi kan nilo, kan dikna hi kan humhim zel dawn, kan dikna chanvo humhimnaah kan chian ve a ngai, politics chu ahranin lo kal rawh se, he UCC lakah erawh kan inhumhim a ngai a, kan party pawhin kan duh loh thu kan thlen tawh a, kan MP te, kan President leh sawrkar ang pawhin kan thlen tawh,” tih sawiin, UCC hi Mizorama hmang lo turin an theih chhung chu an bei zel dawn tih a sawi.
MNF Sr.Vice President chuan, Manipur lama Zohnahthlak unaute awmna Meitei hoin luahlan tumin, an awm phal loin an bei a mi tam takin nunna an hlan tawh a, chung avang rawn raltlan Zohnahthlakte inpuiah an lo kuahkhawm a, CM-in ruahmanna fel tak neiin, tlawmngai pawl leh kohhran te nen pawh inhre pawh zelin hma an la ho a, raltlante tawmhimna leh an mamawh te ngaihtuah thei a an awm te nationalism-in a ken tel zel a nih thu a sawi bawk.