Taliban chuan ram zauh zelin Afghanistan leh Pakistan ramria khaw pawimawhah an puanzar an zar leh ta a, an thuhnuaiah a awm leh tawh.
Social media-a video thehdarhah Kandahar bula ramri khua, Spin Boldak-ah hian flag var a phe lap lap chu hmuh tur a awm.
Afghan thuneitute chuan Taliban-ten he khua hi an la nia an sawi chu an pha a; mahse, social media-ah tho helho leh Pakistani ramri vengtu sipaite inkawm lai a lang.
BBC-in a biakpawh Taliban hotute pawhin ramri khua hi an la niin an sawi bawk.
Tun hnai chawlhkar eng emaw zat chhung hian hel pawl hian Afghanistan ramah huang an zauh nasa hle a. Ramri khaw tam tak chu Afghan sipaite kut atangin an la a, heng zingah hian Iran, Tajikistan leh Turkmenistan an inkalpawhna khuate pawh a tel.
Hetianga Taliban-in rem an zauh hi United States sipaiten September 11-a Afghanistan chhuahsan fel tuma an inthiar chhuah mek laia thleng a ni.
Islamist hel pawl, Taliban hi kum 20 kal ta khan US-in rûnin Afghanistan-a an thuneihna a chhuhsak a. Tuna hma an lak thar lehnaah hian kawngpui pawimawhte pawh lain khawpui liana mamawh chawkluhna pawh an dang nasa hle.
Afghan khua, Kandahar province-a Spin Boldak hi Pakistani khua, Chaman nena inkalpawhna kawng niin ram pahnih inkalpawhnaah chuan a lûn ber dawttu a ni.
Taliban-in Spin Boldak an lak leh hi an tan chuan a pawimawh tak zet niin mi thiamte chuan an sawi a. Pakistan lam nena an insumdawn tawnnaa sum leng vel chu an chang thei dawn a, Taliban hruaitute leh an mite pawh an lo tal tamna khua nia sawi a ni bawk.