Excise & Narcotics Department (END) leh 2nd Assam Rifle thawhdunin Myanmar atanga lak luh, state danga hralh tur nia sawi heroin thahnem tak an man.
Zirtawpni khan an thudawn bawh zuiin END hian Saichaw khaw bulah ruihhlo phur nia rinhlelh changin an duty a. Hemi ni chawhnu dar 2:15-ah an rinhlelh motor pahnih – Bolero (Regn No AR02 M-0543) leh Grand Vitara Car (Regn No TR07F-0451) te chu hmuin an um a. He’ng lirtheite hi an tihdin hnuah lirthei atang hian heroin kg 5 leh gram 114 (hawng 436) chu an man a ni.
Lirtheia chuang, heroin laknaa inhnamhnawih mi pahnih – Jahir Alam (23), Ashabari, Kalamchowra P/S, Sepahijala District, Tripura leh Maram Miah (32), Pandabpur, Antali P/S, West Tripura nia inchhalte chu manin an lirthei te pawh hrensak nghal an ni.
An chhui zelnaah Zirtawpni vek, tlai dar 4:30 khan he thubuaia inhnamhnawih nia puh midang panga – Lalngilneii (44) leh Zoramchuana (49), Hnahlan, Champhai District, tuna Chaltlang Lily venga khawsa mek, Vungkhanthawma (23),, Champhai Vengthar, Tlangnuam; Amir Hussain (31), Madhya Boxanagar, Boxanagar Dist, Tripura; Sukanta Karmakar (35), Champak Nagar, Jirania District, Tripura nia inchhalte hi an man belh leh bawk.
Heroin vanga mante hi The Narcotics Drugs & Psychotropic Substances Act, 1985 (NDPS Act) tlawhchhanin thubuai siamsak an ni a, July 15, 2023 khan Court-ah hruai nghal an ni a. Thiam loh an chang a nih chuan kum 10 atanga kum 20 thleng Jail tan tir leh Rs 1,00,000 atanga Rs 2,00,000 thleng chawitir bawka hrem theih an ni ang.