Kumin kum tawp lama Mizoram state general election lo awm tur nghawng ni maw, tun lai hian in hmun nei lote tana in hmun theh a lar hle a. Sawrkar lai party chuan in hmun nei lote tan tiin vote hmuh belh theihna tur leh party mite tih lawm nan remchang lai ram theh tur an zawng nasa leh ta hle. He hmalaknaah hian Kolasib a KVK ram theh turah chanchinbu miten thil awmzia an lo ngaihvenna chu sawrkar lai party chuan ngai thei lovin na takin an tawng a. An bialtu MLA, minister ni bawk K.Lalrinliana pawhin chanchinbu mite chu party tan bik nei leh sawrkar lai beiah hial a puh ta a ni.
In hmun sem chungchang hi thil ho lam mai mai a ni lova. Khua leh tui nihna dik tak nihna neite chuan chenna hmun chu an nei ngei tur a ni. Sawrkar dana in hmun in pek theihna dan ang thlapa hmun pek hi sawrkar tih tur pawh a ni reng a. Mahse, dan lova in hmun in pek erawh dan kalh anih avangin sawrkar hian a ti tur a ni lo. Dan kalh anih leh nih loh hriatfiah hi mipuite chanvo a ni a. Mipuite aiawh a hna lo thawk a, mipuite hriat tur lo ngaihven hi journalist te hna a ni thung bawk. Hetia Kolasib chanchinbu mite rorel lai party in an khak ta vak mai leh hmingchhe taka an puh hi mipuite tan thil pawi tak a ni a. Sawrkar lai thil tih a ni emaw, opposition lam thil tih a ni emaw, journalist chuan a lo enfiah ve chu a tih tur a nih laia beih let an ni ta mai hian he in hmun in pekah hian thil dik lo, dan kalh a thil tih a awm ngei niin a rin theih hial ta mai. Kan thil tih miin an hriata kan lawm loh hle hi chuan thil dik zan lo deuh kan lo khawih a ni thin.
Chiang zawka Kolasib journalist te thusawi han ngaihthlak hian KVK ram theh tur thu hi KVK lam hotute chuan an lo hre miah lova. An hriat lohin Kolasib MNF party hian a sem dan tur an lo ruahman fel vek a. Ram awl ni lo, a neitu awm, a neitu hriat lohva party leh sawrkar thil tih theihna a lo sem ngawt chu a dik loh avangin chanchinbu mite hian an sawichhuak mai chauh a lo ni. Thil dik lo titu in hetianga a pholangtu an haw viau mai hi ngaihtuah chian tham a awm. Thil dik lo ti tur hian party hi an lo inzirtir em ni reng? Thil dik lo anih miin an sawi reng chunga tilui ngat ngat duh hi mihringah pawh mi huat an ni thin. Chuvangin he ram theh an tum hi sawrkar hian en chiang leh se. Sem luih talh an tum anih pawhin KVK lam atang hian phalna te pawh la se, dan ang thlapin sem teh se.
Tin, political party leh politiciante hi mipui tana thawk an nih ang bawkin journalist te pawh mipuite tan an ni a. Tha takin thawk ho thei sela. Sawrkar thil tih that mipuite hnena hrilh hre tu an nih angin an thil tih fuh lo pawh mipuite hriattirtu an ni tho tih hria sela. Journalist te puh chhe mai lova, an dinhmun hria a, democracy vawng nungtu journalist te dinhmun hrethiamtu sawrkar ni hram teh se.