Aizawl : Home Minister Lalchamliana’n Mizoram leh Assam ramria khaw 62 te chu Bengal Eastern Frontier Regulation (BEFR) 1875 ah chuan Mizoramin a huam chin anga tarlan a nih thu a sawi a. Mizoram chuan BEFR hnuaia inner line reserved forest square miles 509 chu ramria a pawm a nih thu a sawi.
Assam erawh chuan kum 1933-a India map survey anga ramri chu a constitutional boundary a nih thu an sawi ve thung niin Home Minister chuan a sawi a. Mizoramin a huam chin khaw 62 te chu kumin February thla khan Assam sorkarah thehluh a nih thu leh Assam sorkarin a chhanletna an nghak mek thu a awi.
Lalchamliana chuan ramri chungchanga state pahnih te inbiak hun chu ruat a la ni lo tih a sawi a. State pahnih te hi thil hrang hrangah online hmangin an inbe pawp reng niin a awi thung.
State pahnih te hi kum 2021 atang khan ramri chungchang sawifel tur hian an inbe tan a, nikum November thlaa Guwahati-a ramri chungchanga inbiakna hnuhnungberah state pahnihte hian Mizoramin a thusawi thlawp turin thla thum chhungin khaw hrang hrang, an awmna hmun, a huam chin leh mipui chengte leh a kaihhnawih thu dangte chu a pe chhuak dawn tih an lo rel tawh a, heng te hi state pahnih atanga regional committee din chuan an sawidun dawn a ni.
Kumin January khan Mizoram sorkar chuan study group dinin he study group hian Assam hnenah an duhdan an lo thlen tawh a ni.
Chief Minister Zoramthanga leh Assam Chief Minister Himanta Biswa Sarma-te pawhin ramri buai chingfel tur hian November 2021 leh nikum September khan New Delhi-ah vawi hnih an lo inhmu tawh bawk.