Aizawl : Aizawl East II ZPM block-in an party zawm thar lawm luh inkhawm an buatsaih hmanpuitu ZPM leader Lalduhoma chuan ZPM-in sorkar an inrin ai mahin party dangin an rinna a nasa zawk niin a sawi.
Inrinnia Armed Veng South Community Hall-a inkhawmah Lalduhoma chuan thangthar zingah kalphung tihdanglam duh pawl, atchilh lo, thil tak tak duh an tam hle tih sawiin, “He’ng mite hian an ngaihdan huai takin an kalpui ngam tawh a. Sorkar tha duhna pawh thalai zingah a lian hle,” tia sawiin, ZPM-in sorkar an inrin ai mahin party dangin an rinna a nasa zawk a. An va tihbuai pawh ni lovin anmahni an buai em em tih a sawi.
Lalduhoma chuan political party dangte chu ZPM party buaipuiin an buai tih sawiin, “Thu hlui pawh an post nawn tlut tlut peih a. ZPM hian beih kan tawh nasat poh leh kan pun phah zel a, mi khawngaih kan hlawh phah zawk niin a lang a, hmun tinah kan pung zel a ni,” a ti.
Kalphung thar an sawi zingah an ngaih pawimawh em em chu eirukna a nih thu sawiin ZPM leader hian, “Kalphung thar hmangin kan do dawn,” a ti a. Chief minister lal lutuk thin pawh kalphung thar hmangin an tidanglam dawn tih a sawi a. Party President leh chief minister nihna hi mi pakhatin a chelh kawp dawn lo a. Chief Minister in works portfolio a chang ve lo tur ringawt pawh kalphung thar a nih thu a sawi a. ZPM an sorkar chuan Lok Ayukta an thuam chang ang a, CBI koh luh chungchang pawh PAC-ah an rel tawh niin a sawi.
ZPM leader hian mipuii party sorkar an ning tawh tih sawiin, “Mipui sorkar kan duh. Hna lak chungchangah pawh mahni duhsak zawngte thun remchanna board phuahchawp ang hi kan ti ve dawn lo. Heti lam buaipui tur MPSC kan nei reng a, an kutah a awm mai dawn a ni,” a ti bawk.
Block Vice President R. Lalrinzuala kaihhruai inkhawmah hian ZPM Aizawl East II bial viltu B Lalchhanzova, AMC Councillor Christina Roluahpuii Sailo leh Dampa bial viltu Vanlalsailova te pawhin thu an sawi a ni.