Central YMA hnuaia Central Anti Drugs Squad-in ram dang sava an man, Aizawla sahuana an dah, tun hnaia bo chu hmuh let a la ni lo a, sava bo chungchangah hian sahuan thawktute an inhnamhnawih leh hnawih loh en zui mek a ni.
CADS-in June 30-a Seling daia ram pawn atanga dan lova tawlhruk sava an man, Lears macaw chu court thupekin forest department kutah hlan a ni a, July 1 khan Aizawl sahuanah dah niin, July 3 khan sava hi a bo ta a, hemi chungchangah hian forest department chuan Sairang Police station-ah FIR an thehlut.
The Zozam Times zawhna chhangin Sairang Police Station hotute chuan sava bo chungchang thubuai chu an chhui zui mek thu an sawi a, tun dinhmunah chuan sahuana CCTV-a video footage an endik bakah tul dangte pawh an bawhzui mek tiin, hemi kaihhnawihah hian man an la nei lo.
Hemi chungchanga zawhna chhangin forest department hotute chuan sahuan atanga sava bo chungchanga an hmalakna sawiin, police station-ah FIR an theh luh nghal thu te, an mi leh sate an inhnamhnawih em tih an enzui mek thu te an sawi a; sava a bo hnu hian thawktute pawh indaih lo chungin tlaivarin a inchhawka duty-tir an ni a, hetiang thil hi a thlen zui tawh lo nan theithawp an chhuah zui nghal tih a sawi.
Forest deprtment hotute chuan sava bo ta an dahna hmun chu hmun ualau lo tak, kawng atang pawha lang thei lo leh a hmun hre sa lo tan a awm tih pawh hriat harsa tak a nih thu a sawi a, heti chunga a bo chu thil thil mak tak a nih thu an sawi.
Tar lan tawh thin angin Central YMA chuan CADS-in ram dang sava an man, forest department hnena him taka an hlan, Aizawl sahuana dah luh a nih hnua a bo chu an hrethiam lo hle tih thuchhuah siamin an lo sawi tawh a, sava bo hmuh let a nih theih nan leh a bonaa mawhphurtute hrem an nih ngei theih nan hma la turin forest department hotute an ngen a ni.