South Korea-a Cheongiu khawpui bul leiverh tuiin a chima car tangte an luhchhuahnaah ruang pakua hmuh a ni.
Tun hnaia ni eng emaw zat ruah a sur hnuah leiverhah hian tui nasa takin a lut a, a chhunga awm mek lirthei khalhtute leh an mi phurhte chu che sawn thei lovin an tang a ni.
South Korea-ah hian tui lian leh lei min vangin mi 37 an thi tawh a, hmun tam takah power supply an nei lo bawk.
Mi pakua chin hriat lohvin an la awm mek bawk.
Osong khuaa leiverh metre 685 zeta thuiah hian mi engzat nge tang chiah hriat theih a ni lo va; mahse, tui hian lirthei 15 a chim ngei nia hriat a ni.
Bus chhungah ruang eng emaw zat hi hmuh a ni a. Inrinni khan mi pakua chhanchhuah an ni bawk.
Thi dang tam zawk hi tlangram, North Gyeongsang region-a lei minin in a hnawla mite an ni bawk.
South Korea-ah hian Inrinni khan ruah mm 300 zet a sur a ni.
Korean Meteorological Association chuan an ram hian kum khatah ruah mm 1,000 atanga 1,800 vel an dawng thin a, heng zinga a tam ber hi nipui laia an dawn a ni.
Vansang atanga tui lenna hmun thlalakah chuan lei leh tuiin nasa taka a chim te, in chung chauh lang thei khawpa awm te hmuh tur a awm.
Tual chhung sorkar leh Prime Minister Han Duck-soo chuan inthiar chhuak turin mi sang tam tak an ti a, sipaite chu chhanchhuah hna thawk tura tih an ni bawk.
Inrinni zingah khan Goesan Dam, North Chungcheong an tih bawk a luan liam tan avangin mi 6,400 an insaseng bawk.
Hmun hniam laia awm khuaa cheng leh heng khaw pawhtu kawngte chu tuiin a chim a, mi tam tak an chenna inah an tang bawk.
Zirtawpni zanah khan lei minin North Chungcheong-ah rel a hnawl bawk a; mahse, passenger phur a ni lo va, engineer pakhatin hliam a tuar thung.
An ram rel thununtu, Korail chuan ruah sur nasa avang hian rel tlan muang chi leh chak chi thenkhat pawh an zin tur an thulhtir hlawm tih an sawi.
Korea Meteorological Administration chuan Nilaini thleng ruah a la sur tam thei dawn niin an sawi a. Chhiatna nasa zawk thleng thei niin an sawi.