Congress party-in nimin khan Aizawl Press Club-ah thu thar thehdarhtute kawmin, Lengte-a ISPAT chungchangah thu dik lo sawiah ZPM leader Lalduhoma an puh.
Congress thupuangtu, Dr Lallianchhunga chuan ZPM Leader Lalduhoma hian October 29, 2018 khan Zaingen YMA Hall, Khawzawla a thusawinaah Lengte-a ISPAT Industry chu sorkarin Rs. vaibelchhe 100 tam tak sorkarin loan a pe a, chutah chuan Congress sorkar hi guarantor-ah a tang a. Chumi awmzia chu ISPAT company-in loan lak a rulh theih loh chuan Congress sorkarin a rulhsak ang tihna a nih thu a sawi a. He thu hi kum li liam taa a sawi pawh nise dawt a nihna a la bo loh avang leh a thusawina video hi YouTube hmanga vawrh darh a la nih lehzel avangin thudik zawk mipui hriata puanchhuah tula a hriat thu a sawi.
Dr Lallianchhunga chuan MPCC Legal Cell member pakhatin RTI dilnaah Mizoram sorkara Commerce & Industries Department-in ISPAT Industry hnenah loan pek a nei lo va, guarantor-ah pawh a tan loh thu tar lan a ni a. ISPAT industry-in loan an dilnaah industry director chu guarantor-ah a tang lo tih leh Mizoram sorkar pawh guarantor-ah a tang lo tih hi February 21, 2012 khan sorkarin a thuchhuahah a lo tar lang daih tawh a. April 27, 2016 a sorkar thuchhuahah ISPAT Industry hian an bul tan nan NEDFI leh SBI, Guwahati atangin loan Rs. vbch 20 an lak thu tar lan a nih thu sawiin, “Lalduhoma’n Mizoram sorkarin Rs. vbch 100 tam tak loan pe anga a sawi chu thubelhchian dawn lo, dawt chiang tak a ni,” a ti.
ZPM leader leh an chief ministerial candidate Lalduhoma’n finfiah leh nghal mai theih ang chi-ah pawh chinchang hre lo zawk mipuite hnena thubelhchian dawl lo a sawi hreh lo hi Mizoram tana ‘Pa’ nih tling a nih lohzia a lantirnaah an ngai tih sawiin Dr Lallianchhunga chuan a sawi a. “Mizoram CM nih tum ve tan thubelhchian dawl lova mipui bawl vak vak hi thil tihawm leh mawi pawh a ni lo va. Tun hnuah fianfiah tlak thubelhchian dawl chauh Mizoram mipuite hnenah sawi tawh turin kan phut a ni,” a ti bawk.