- Zirsangkima
Êng rii riai hnuaia a lám chu ka hmu phé deuh ruai a—Bourbon whisky no hnih ka lo tlâk tawh vàng nge ni. Chû nula chu en zawh ruala thlêk leh nghâl min chawha rilru min kap tlattu ang chi hmél pú hi a ni a. A sam chu a kir deuh chiat a—bumro erawh a ni lo. A pian, a mal leh a mawng báwr leh a áwm báwr zawng zawngah chuan, mipa inti chin awhzáwng chu a inbel kim vek ang tih tùr khawpa îtawmnaa chei màwi—‘chawp’ ni loa ‘duan’ a ni.
Chu nu chu
Ka va hnaih a. Ka en chiang a. A hmél chu le!—‘A takin angel ka hmu ta!’ ti ta ila, ka thu sawi ngaithlatuten, tawngkam uar lua-ah min ti ngei ang. Mahse, chu aia han sawi fiah ngaihna chu ka hre chuang si lo. Tin, ka tawngkam leh ka tawng hmang thiamna hian, a hmél awm dàn mawi fuhzia hi a sép fu pha chatuan ngai dáwn si lo a! Aw … Bible-a Sam ziaktu Davida kha han ni ila, amah hi fak chikimin han fak ila ka inti mang e aw …
A mit meng chu a dum lo a, a pãwl hek lo—a hring riai ringawt. Chu chu a taksa ruangám chuan a inhmehpui vek si a. A sam pawh—a kir deuh chiat ka tih tawh kha; tin, hmeichhe tam tak sam rawng dum angin a dum lo, buang ni si lo hian a awm a, a hring ka ti dáwn nge ka hre lo—ka sawi thiam lo—a hmél, a mit meng, a pian zawng zawng nèna inmil ber rawng a ni e! A nui pawh hmeichhe nuih angin a nui ve tho a; mahse, a nuih pahin ani biang chu a khuar kãih thin—mi dang biangsum nei ang a ni leh chuang lo—biangsum, amaha beta a inhmeh tùr bîk liau liaua siam biangsum a nei bîk, ka tihna a nih chu.
Chû mit meng, chû nui hmél, chû sam, chû pian, chû hmeichhe mal leh áwm báwr … amah ngau ngau pawh chuan kan awmna pindan—lám duhte làmtual leh zai thiamte zàina hmun chu a chei mawi zo êm êm a. New York khawpuia bar lãr, East 27th Street leh Fifth Avenue inrìna kianga ding, “230 Fifth Rooftop Lounge” chu a màwi zo ngawih ngawih a. Zan reia, piah lawka Empire State building êng chiaite paw’n, an màwina an hloh thak thei hial! Chù nú màwina chu an zah zo vek a niang!
Chû nula chu, chû hmeichhia ka sawi lai chu, màwina famkima inbela, thuam chawp ni loa Siamtu’n máwia tùra thuama a siam chu … ka va bèl chiang a; hmãnah kha chuan, ka tã a ni thin maw le!
Ka tã ni ta lo chu!
Làmpui a nei a. Chu pa—mi vannei ber nèn chuan inkuah rialin an lám a. Ka thîk a ni tih chu lan chhuahtír loh hrãm ka duh tak zet! Mahse, a harsa a ni—a chhe lo mai siah! Chû làmtual chu a màwi mai sia(h)!
Min kalsan lai ai khân ka hmu tha zâwk a; tin îtawmin a duhawm zâwk bawk. Mipa piang tawh zínga mi vànnei ber—amah changa làmpuia kawp thei nèn chuan “an va’n ni êm!” tih tùr khawpa inhaw lo hian an lám dùn a. Làmtual chu an màwi thlâwt e!
Ka tã a nih lai khân hetiang teh hrep hian “a chhiat loh” ka hre ngai lo a; hetiang khawpa îtawm a nih ka ngaihtuah ngai lo. Ani ka chàn vànga ka chan chu zu bawiha tàn a ni mai ta si a. Chû “an pa thar” lah chu ka thian hnai êm êm a la ni zui a!
Bán invuana inkaia an lám dùn saw ka hua! Mahse, tih theih ka nei tawh si lo … “Hlimin i nun hmang la,” te kha ka tia—kan inthen hlim khân. Mahse, a hlim hi ka hlau a, nuam tia kawppui a hmu hmél hi ka ngei a ni ta si sia … Hlimna leh lungawina chu a chang ngei alãwm—saw! Mahse, hlim se ka ti lo a, chù pâ-ah chuan lungawina hmu se ka ti si lo. Ka awm dàn hi thiam a har asin! Ka tã ni ta lo, chhe lo tawlh tawlh insãwia lám thlírtu nih chu … ka hrilh ang che, a nuam thlâwt lo! He lai 230 Fifth Rooftop Lounge aia hremhmun kal hi a châkawm zâwk ngawih ngawih mai a ni!
Kan khatih lai khán …
Ani nèn chuan a kuma kum chuang chu kan inzui ve ngei alãwm. Mahse, bawrhsáwma siamin ka ti duhdah a. Ka kut tuar kha ina ka awma a hna ber a nia. Ka zu in kha, in uchuak ka ni a. Min dawh fan fan zâwk a, min ngaidam chàwl ngai lo a. “Êm êma na!” a tih chinah min then ta a. Min chhuahsanin min kalsan a. Kei erawh dáwngin ka awm phah a…
Min mamawhtu a nih thinzia kha ka la hria. Min ngai bertu pawh a ni thin. Mahse, ka khaw lo a, nikhaw hre lo khawpa khaw lo khán ka tàl a. A laka ka tih ve chhun chu, kut thlâk leh hmiah kha a ni!
Zaninah ka hmu leh a. An pa thar nèn chuan, khawvêl hi an ning hlawl lo, tih hriat tùr khawp hian an lám dùn a nih chu! Hetianga an awm dàn ang hian, hmãnah khán, anni nèn hian kan lo awm dùn ve tawh thin a, hlim ní te pawh kan lo hmu dùn tawh thin. Min rawn hmù a, ka va nuih ve ngawt a—min hre duh hmél a pu duh tawh lo!
Zanin zet zawng—ná ka tuar a ni. Zêp thu a chêng lo—an pa thar chu ka thîk tak zet a. Mahse, tih lan a tûl lo a, a rem tawh hek lo. Va hnaiaha va lawk nghenga hnek chawrh chu ka châk tak zet; mahse, thil tih chi a ni lul tawh lo!
Ka tã thin kha!
Amah chu ka tã thin kha a ni. Ni e, vawiinah pawh hian ka la ngai a, amahah chuan màwina ka la hmu. Mahse, ka zia loh thin êm avàngin min kalsanin, ka ai awh tùr, a duh tak mai chu a thlang ta a!
Keimaha theihna leh chakna awm zawng zawng hian, amah ka ngaihna zawng zawng nèn pawh a ni ang, chhuh luiha neih lêt leh chu ka châk ngang mai. Mahse, thil ka lo tih sual tawh ngawng khân ani zawng a nghawng na êm mai—tih luih chi a ni lul lo! Ani rilru pawh a nih ve ngei ka ring—felin tha tê tê-in lo dãwm ila chu, kan heti tùr a ni hauh lo a; mahse, ka thiam loh vek a ni—ka lo khati lutuk kha!
Ka en leh thin—a hmél, a pian, nuih paha a biangsum zawng zawngte chu … “Ka tã a nih thin nèn…” tih bâk sawi tùr ka nei tawh si lo a!
She Used To Be Mine
– Brooks and Dunn
She looked so good movin’ ‘cross the dance floor
Better than the day she left me
Arm in arm with somebody new
Holdin’ hands and laughin’ like we used to
I got my best smile on, but it’s no disguise
It don’t hide the pain in these eyes
I did her so wrong, for so long
Turned my back on her love, now she’s long gone
I did my part, to break her heart
She walked out on me, and tore my world apart
She used to be mine
Oh, she used to be mine
It’s taken every bit of strength that I have
To keep a hurt look off of my face
I can’t keep from lookin’ back over my shoulder
At the lucky man takin’ my place
Oh, if it weren’t for my pride, I’d probably take off runnin’
Guess what I’m feelin’, is what I got comin’